Clare Azzopardi u Loranne Vella fil-Festival tal-Ktieb fis-Sajf

  1. Kunsill Nazzjonali Tal-Ktieb
  2. Festivals
  3. Clare Azzopardi u Loranne Vella fil-Festival tal-Ktieb fis-Sajf




Posted on June 27, 2017

L-ewwel ġurnata tal-Festival tal-Ktieb fis-Sajf fl-14 ta’ Lulju se tkun fuq it-tema taż-żgħażagħ u l-letteratura. Kemm il-Kunsill Nazzjonali tal-Ktieb kif ukoll numru ta’ pubblikaturi lokali ħejjew attivitajiet ibbażati fuq it-tema magħżula, sabiex janalizzaw aspetti differenti tal-letteratura għaż-żgħażagħ u l-litteriżmu fost iż-żgħażagħ. Fl-ewwel  attività kulturali tal-ġurnata, il-Kunsill Nazzjonali tal-Ktieb se jippreżenta żewġ awturi magħrufa, Clare Azzopardi u Loranne Vella, li se jaqraw siltiet tax-xogħol tagħhom.

Grazzi għall-kotba tagħha li kisbu suċċess enormi mat-tfal u l-adulti żgħażagħ, kotba li tipikament jindirizzaw temi rilevanti ħafna bħall-kaċċa, il-midja soċjali u kwistjonijiet tal-familja, isem Clare Azzopardi huwa magħruf sew mal-pubbliku Malti. Il-kittieba, li ġiet rikonoxxuta kemm il-darba għax-xogħol tagħha fil-qasam tal-kitba, taħdem bħala l-Kap tad-Dipartiment tal-Malti fil-Junior College u tikteb kemm għat-tfal kif ukoll għall-adulti. Bħala membru attiv ta’ Inizjamed, hija ħadet sehem fl-organizzazzjoni  ta’ bosta attivitajiet letterarji u workshops, ħafna drabi b’kollaborazzjoni ma’ Literature Across Frontiers. Kienet waħda mill-10 Vuċijiet Ġodda ta’ l-Ewropa fl-2016.

Fl-attività msemmija, Azzopardi se tkun qed taqra mill-kotba tagħha Frejp, rakkont tal-twissija fuq il-perikli u l-iżvantaġġi tal-użu ħażin tal-internet,  Il-każ kważi kollu tal-aħwa De Molizz, ktieb illustrat sabiħ ħafna li jħares lejn ir-relazzjoni iebsa bejn l-istudenti żgħażagħ u l-istruttura amministrattiva tal-iskejjel, liema ktieb ngħata l-Premju Nazzjonali tal-Ktieb 2010, u s-serje immensament popolari Jake Cassar, li teżamina temi bħal ansjetà li jġibu l-eżamijiet, ir-rivalità tal-aħwa u l-effett ta’ protezzjoni żejda min-naħa tal-ġenituri.

Loranne Vella hija l-iktar magħrufa fost il-qarrejja żgħażagħ għat-triloġija II-Fiddien, li kitbet flimkien ma’ Simon Bartolo. It-tliet kotba fit-triloġija – Sqaq l-Infern, Wied Wirdien u Il-Ġnien tad-Dmugħ – kisbu l-Premju Nazzjonali tal-Ktieb fil-kategorija rispettiva tagħhom. Fl-2016, it-traduzzjoni tagħha ta’ Violeta ta’ Abril Calero rebħet il-Premju Terramaxka fil-kategorija għall-kotba maqluba għall-Malti. Fl-attività msemmija, ser tkun qed taqra minn Magna (TM) Mater, rumanz li ħareġ fl-2011 u kien miktub speċifikament għal adulti żgħażagħ. Ir-rumanz jieħu bħala l-isfond tiegħu lil Malta fis-sena 2020, u jittratta aspetti differenti bħall-bidla fil-klima, is-cyberspace, skateboarding u l-ħbiberija. L-istorja ddur ma’ Elizabeth, erojina mhux tas-soltu, li trid bilfors issib is-soluzzjoni ta’ misteru konness mal-passat tagħha. Fl-istess waqt trid tissielet ma’ sentimenti ġodda li qed tqanqal fiha r-relazzjoni tagħha mal-ikbar ħabib li għandha. Il-‘Magna’ fit-titlu tirreferi għall-internet u l-azzjoni fir-rumanz timxi fl-isfond ta’ Malta li qed tibda tħoss l-effetti qerrieda ta’ bidla fil-klima salvaġġa u inkontrollabbli.

Il-Kunsill Nazzjonali tal-Ktieb huwa kburi li jippreżenta dawn iż-żewġ awturi u x-xogħol tagħhom li huwa indikattiv ta’ bidla fil-letteratura għat-tfal u ż-żgħażagħ mill-letteratura tradizzjonali tat-tfal li kienet tipikament mimlija slapstick għal waħda aktar responsabbli u li tinvolvi ruħha b’mod soċjali waqt li tkellem lill-qarrejja żgħażagħ fuq kwistjonijiet serji  u ta’ tħassib profond.

Share Article