Kummenti huma off għal din il-kariga

Festival tal-Ktieb fuq il-Kampus 2018: Il-Programm

Dan huwa l-programm ta’ attivitajiet kulturali għall-Festival tal-Ktieb fuq il-Kampus 2018 (verżjoni għall-mowbajl). Il-Festival se jsir fil-quadrangle tal-Università fil-21-22-23 ta’ Marzu u se jkun miftuħ fil-21 u fit-22 ta’ Marzu mid-9am sa l-4pm u mid-9am sa tard nhar il-Ġimgħa 23 ta’ Marzu. Il-programm huwa mimli attivitajiet, li jinkludu tnidijiet u preżentazzjonijiet ta’ kotba, intervisti u taħditiet ma’ awturi, artisti u akkademiċi, kollha maħsuba biex jindirizzaw kwistjonijiet li għandhom ikunu ta’ interess kbir għal studenti universitarji kif ukoll għall-membri tal-pubbliku li għandhom għal qalbhom il-kotba u l-letteratura.

Fost l-attivitajiet ewlenin ta’ din is-sena ser ikun hemm workshop u żewġ taħditiet mal-mistieden speċjali, Jasmin B. Frelih, kittieb Sloven u rebbieħ tal-Premju tal-Unjoni Ewropea għall-Letteratura (2016). L-awtur lokali Immanuel Mifsud se jmexxi taħdita ma’ Frelih dwar it-tema tal-letteratura Jugożlava, filwaqt li Noel Tanti se jintervista lill-awtur fuq suġġetti aktar ġenerali. Frelih se jieħu sehem ukoll f’sessjoni ta’ palk ħieles li se ssir fl-aħħar jum tal-Festival, il-Ġimgħa 23 ta’ Marzu. Dawk kollha li jżuru l-Festival huma mistiedna jipparteċipaw f’din l-attività u jitilgħu fuq il-palk sabiex jaqraw, jkantaw, idoqqu jew jirreċtaw xi test preparat għall-okkażjoni jew inkella spirtu pront.

Attivitajiet oħra jinkludu għadd ta’ tnidijiet ta’ kotba bħal The Maltese Cinderella ta’ Dr Veronica Veen, preżentazzjoni dwar William Blake u t-tekniki tal-istampar mill-artist lokali magħruf Jesmond Vassallo, żewġ sessjonijiet mal-istudjuż Ġermaniż Moritz Sommer, kif ukoll ser jintwera film qasir ta’ 16-il minuta, Frankenstein ta’ J. Searle Dawley, segwit minn diskussjoni dwar l-adattament tal-kapolavur ta’ Mary Shelley għaċ-ċinema ma’ Prof. Savior Catania u Prof. Gloria Laura Lucente.

Għal dawk b’interess fil-lingwa Maltija u l-istorja tagħha, Għaqda tal-Malti ħejjiet numru ta’ attivitajiet eċċitanti, inkluż diskors minn Dr Bernard Micallef dwar intellettwali Malti tas-seklu 17, Giovan Francesco Bounamico, diskussjoni ta’ Michael Zammit dwar il-filosofija bil-Malti, u żjarat iggwidati fit-taqsima tal-Melitensia tal-Librerija tal-Università li normalment ma tkunx miftuħa għall-pubbliku.

Il-Ktieb Festival fuq il-Kampus, li huwa mtella’ mill-Kunsill Nazzjonali tal-Ktieb f’kollaborazzjoni mal-Għaqda tal-Malti – Università, huwa miftuħ għal studenti, akkademiċi u membri tal-pubbliku. Għal aktar informazzjoni segwi l-paġna FB u s-sit tal-Kunsill (www.ktieb.org). Tista’ tniżżel il-programm f’format pdf hawnhekk (verżjoni għall-mowbajl).