F’dan l-episodju ta’ ‘Taħt il-Qoxra’, Rachelle Deguara tkellmet ma’ Miriam Calleja dwar kif hi bħala persuna u poeta hi riflessa fil-poeżija tagħha, l-aktar dawk fil-ġabra ‘Pomegranate Heart’.

Il-mistiedna rrimarkat li l-poeżiji tagħha f’dal-ktieb huma bħat-traċċi li kull persuna ħalliet fil-ħajja tal-poeta, hekk bħal meta tofsoq rummiena u jaqgħu s-snien ta’ ġo fiha, waħda waħda. Hu għalhekk it-titlu tal-ġabra.

Fil-poeżiji tagħha Miriam tgħid li titnebbaħ mill-imħabba, l-ikel u n-natura, elementi li ssostni li bilfors il-bniedem irid jiltaqa’ magħhom jew jaffaċċjahom.

Tagħti wkoll ir-raġunijiet tagħha għala tikteb l-aktar bl-Ingliż milli bil-Malti.

Miriam Calleja hija poeta u awtriċi li tikteb bil-Malti u l-Ingliż. Kitbet żewġ kotba ta’ poeżiji, u kitbiet tagħha dehru f’diversi antoloġiji lokali u internazzjonali. Xi xogħol tagħha ġie tradott għas-Sloven, u ħadmet fit-teatru, il-mużika u ż-żfin. Miriam hija spiżjara.

Segwi aktar minn din l-intervista hawnhekk.

Il-Kunsill Nazzjonali tal-Ktieb jirringrazzja lill-PBS u lill-ħaddiema ta’ Radju Malta 1 għall-għajnuna bix-xandir tal-programm.


Share Article