Inkontri Letterarji Qosra ma’ professjonisti tal-pubblikazzjoni waqt il-Festival Nazzjonali tal-Ktieb 2019

  1. Kunsill Nazzjonali Tal-Ktieb
  2. Festivals
  3. Inkontri Letterarji Qosra ma’ professjonisti tal-pubblikazzjoni waqt il-Festival Nazzjonali tal-Ktieb 2019




Posted on October 20, 2019

Bil-parteċipazzjoni ta’ awturi mistiedna, pubblikaturi u dawk kollha li jaħdmu fil-qasam tal-kotba u l-kitba, il-Festival Nazzjonali tal-Ktieb kull sena jħejji programm rikk ta’ attivitajiet u avvenimenti. L-‘Inkontri Letterarji Qosra’ huma opportunità ġdida waqt il-Festival għal dawk li huma interessati fid-dinja tal-pubblikazzjoni u dejjem xtaqu jkunu jafu aħjar lin-nies li jaħdmu fiha, inkella għandhom xi mistqosija jew jixtiequ jistabbilixxu relazzjonijiet professjonali ġodda.

L-‘Inkontri Letterarji Qosra’ se jagħtuk il-possibbiltà li titkellem mal-awtur favorit tiegħek, tressaq xi proġett biex tħajjar pubblikatur lokali, jew tiddiskuti ma’ professjonisti stabbiliti modi varji ta’ kif tista’ tidħol fis-suq.

L-inkontru jieħu l-forma ta’ laqgħa ras imb ras li ddum 15-il minuta ma’ awtur jew professjonist fis-settur tal-għażla tiegħek. Tul il-Festival se jkun hemm pubblikaturi, qarrejja tal-provi, kittieba lokali u internazzjonali, illustraturi u nies oħra li se jkunu qed jiddedikaw sessjoni ta’ siegħa li ssir fl-Author’s Hub fis-sala kif tidħol, Sagra Infermerija.

Segwi il-ħoloq biex tibbukkja l-laqgħa tiegħek mal-parteċipanti ta’ dis-sena.

Il-Ħamis 7 ta’ Novembru


17:30-18:30 – Il-kittieba Amerikana Kali Wallace

Kali Wallace studjat il-ġeoloġija u rċiviet Dottorat fil-Ġeofiżika, qabel ma rrealizzat li tħobb aktar tivvinta dinjiet immaġinarji milli tirriċerka dawk reali. Hija l-awtriċi tar-rumanzi għaż-żgħażagħ Shallow Graves u The Memory Trees u r-rumanz fantaxjentifiku City of Islands għal-tfal kbar tal-primarja. L-ewwel rumanz tagħha għall-kbar, it-thriller tal-orrur Salvation Day, ippubblikatu aktar kmieni dis-sena. Il-finzjoni qasira tagħha dehret fi Clarkesworld, F&SF, Asimov’s, Tor.com u fuljetti oħra ta’ letteratura spekulattiva. Tgħix fin-naħa t’isfel ta’ Kalifornja.

Thur 7 November

 

17:30-18:30 – Il-pubblikatur Audrey Cassar (BDL Publishers)

Audrey Cassar ġiet lura Malta fl-2017 wara li studjat il-Liġi fl-Istati Uniti. Meta ġiet iddedikat il-ħin kollu tagħha lil Book Distributors Ltd. fejn tieħu ħsieb l-immaniġġjar ta’ kuljum u tfittex modi innovativi ta’ kif twassal pubblikazzjonijiet ta’ kwalità lill-pubbliku. Audrey hija appassjonata tal-qari diġitali u bħala d-direttur ta’ Octavo MT bħalissa qed taħdem fuq proġett edukattiv għall-qarrejja tal-Malti fil-primarja.

 

 

18:30-19:30 – Il-professjonist fl-istampar Franco Portelli (Gutenberg Press, Malta)

Franco Portelli huwa l-Kap tal-Iżvilupp tan-Negozju f’Gutenberg Press Ltd., kumpanija Ewropea ewlenija tal-istampar u l-akbar stamperija f’Malta, b’aktar minn 35 sena esperjenza fis-servizzi tal-istampar.

.

 

 

20:00-21:00 – Il-kittieb Brittaniku Jon Courtenay Grimwood

Jon Courtenay Grimwood twieled Malta u trabba fil-Lvant Imbiegħed, ir-Renju Unit u l-Iskandinavja. Kiteb għal bosta gazzetti u fuljetti Brittaniċi ewlenin. Felaheen, it-tielet rumanz fit-triloġija ‘Arabesk’, rebbħu l-British Science Fiction Association Award (BFSA). Ir-rumanzi tiegħu għamluha mal-finalisti ta’ bosta premji oħra, fosthom il-Premju Arthur C Clarke, il-British Fantasy Award u l-Premju Kommemorattiv John W Campbell. Xogħlijietu nqalbu f’aktar minn 10 lingwi.

 

 

 

 

Il-Ġimgħa 8 ta’ Novembru

 

17:30-18:30 – Il-pubblikatur Joanne Micallef (FARAXA Publishing, Malta)

Joanne Micallef hija l-fundatriċi u Direttriċi ta’ FARAXA Publishing, kumpanija stabbilita  bil-għan li tippubblika xogħlijiet tradotti letterarji u mhux, mingħajr ma teskludi ġeneri oħra. FARAXA ppubblikaw traduzzjonijiet bil-Malti ta’ xogħlijiet t’awturi rinomati bħal Baum, Camus, de Maupassant, Fournier, Reza, Schmitt u Weiss fost oħrajn, kif ukoll introduċew kittieba Maltin ewlenin fis-swieqi globali fl-Ingliż, il-Malti, il-Ġermaniż, it-Taljan u l-Ispanjol.

 

19:00-20:00 – Il-pubblikatur Sarah Davis-Goff (Tramp Press, Irlanda)

Sarah Davis-Goff (l-Irlanda) waqqfet Tramp Press flimkien ma’ Lisa Coen fl-2014 bil-għan li jiskopru, irawmu u jippubblikaw talent letterarju eċċezzjonali.

Fi Tramp Press huma kommessi biex isibu l-aqwa u l-aħjar kotba minn awturi ġodda u stabbiliti, ippubblikaw ukoll awturi li rċevew kritika tajba immens bħal Thomas Morris, Sara Baume, Joanna Walsh, u Mike McCormack. Davis-Goff hi wkoll l-awtriċi tar-rumanz post-apokalittiku Last Ones Left Alive (Tinder Press, 2019).


Is-Sibt 9 ta’ Novembru

 

10:00-11:00 – Il-pubblikatur Gordon Pisani (Kite Group, Malta)

Gordon Pisani huwa l-kofundatur u Direttur ta’ Kite Group Publishing.

Kite jippubblikaw titli kontemporanji u joffru lill-qarrej materjal ta’ kwalità għolja. Il-kumpanija toffri s-servizzi tagħha biex jiġi ppubblikat materjal ippreparat, b’kollaborazzjoni mill-qrib mal-klijenti tagħha.

 

 

17:00-18:00 – Il-professjonist fl-istampar David Camilleri (Gutenberg Press, Malta)

David Camilleri huwa l-Kap tal-Kummerċ f’Gutenberg Press Ltd.

.

 

 

 

 

19:00-20:00 – Il-qarrej tal-provi fil-Malti u traduttur Kevin Saliba

Kevin Saliba huwa kittieb, traduttur u riċerkatur. Fl-2006 ippubblika Ħbula Stirati ma’ 4 poeti oħra u wħud mit-traduzzjonijiet tiegħu dehru fil-fuljetti letterarji Il-Malti (Akkademja tal-Malti) u Leħen (Għaqda tal-Malti). Fl-2015 ippubblika ġabra ta’ traduzzjonijiet ta’ poeżiji bil-Malti tal-poetessa Sirjana Maram al-Masri bit-titlu Nisa Bħali. Fix-xhur li ġejjin mistenni jippubblika Huis Clos (Bil-Bieb Mitbuq) ta’ Jean-Paul Sartre. Ir-riċerka tiegħu tinkludi l-Filosofija Kontinentali, l-Eżistenzjaliżmu, il-Filosofija tar-Reliġjon, il-Filosofija tal-Lingwa, l-Istudji fit-Traduzzjoni u t-traduzzjoni Bibblika tax-xogħol ta’ Peter Paul Saydon.

17:30-18:30 – Il-ġurnalist u l-kittieb Teodor Reljić 

Teodor Reljić twieled Belgrad (1985) imma trabba Malta (mill-1992 sal-lum), u huwa awtur u kittieb indipendenti ta’ artikli, u editur kulturali u kritiku tal-films mal-MaltaToday. L-ewwel rumanz tiegħu, Two, hu ppubblikat ma’ Merlin Publishers. Riċentament ġie ppubblikat minn Weird Fiction Review, Le Monde N’Est Pas Rond u Filmkrant. Bħalissa qed jikteb MIBDUL, li hu l-ewwel komik serjalizzat f’Malta li se jkun illustrat minn Inez Kristina u mniedi fl-2019 minn Merlin Publishers. Teodor studja l-Ingliż u ġab il-Maġisteru mill-Università ta’ Malta fl-2010.

 

 

17:30-18:30 – L-editur u qarrej tal-provi fl-Ingliż Elizabeth Cortis (Proofreading Malta)

Elizabeth Cortis hija editur u qarrejja tal-provi fl-Ingliż kif ukoll tmexxi Proofreading Malta. Fl-irwol professjonali tagħha toffri servizzi ta’ qari tal-provi u editjar lil studenti universitarji, akkademiċi, aġenziji tal-gvern u korporazzjonijiet. Bħala editur tagħti pariri siewja u oġġettivi lill-kittieba dwar il-kitba tagħhom u kif jistgħu jibdlu l-manuskritt tagħhom fi ktieb li jbigħ. Editjat ammont sostanzjali ta’ kotba b’ġeneri differenti fosthom letteratura għat-tfal, mhux fittizji (filosofija, negozju u għajnuna personali) u finzjoni.

 

18:30-19:30 – Id-disinjatur grafiku Marco Scerri (Malta)

Marco Scerri huwa disinjatur grafiku bbażat fi Glasgow l-Iskozja. Marco ltaqa’ mad-disinn grafiku l-ewwel darba minn missieru u nannuh. Wara li ggradwa fid-disinn grafiku mill-Kulleġġ tal-Arti f’Edinburgh, compra jistudja l-fotografija u l-komunikazzjoni viżiva mill-Iskola tal-Arti fi Glasgow. Xi xogħol tiegħu jinkludi d-disinn ta’ numru ta’ kotba tal-arti.

 

 

20:00-21:00 – Il-pubblikatur Tony Ward (Arc Publishers, UK)

Tony Ward huwa l-Editur u d-Direttur ta’ Arc Publications. Waqqaf il-kumpanija fl-1969 u mbarka biex jintroduċi xogħol ġdid lill-qarrejja, għall-bidu bil-pubblikazzjoni ta’ fuljetti magħmula bl-idejn u aktar tard b’kollezzjonijiet sħaħ. Ħamsin sena wara Tony Ward imexxi l-istamperija li llum hi kumpanija b’responsabbiltà limitata, mad-Direttur l-oħra Angela Jarman u Bord Editorjali ta’ tlieta min-nies. Il-kumpanija tipproduċi mal-25 titlu ġdid kuljum. Ward għadu jżomm mal-prinċipji tal-bidu: li jintroduċi l-aqwa talent ġdid lill-qarrejja Brittaniċi li jinkludu vuċijiet lil hinn minn din l-art li li kieku ma kienx għalih ħadd ma jsir jaf dwarhom, filwaqt li jibqa’ jippubblika letteratura kontemporanja.

Arc Publishers ippubblikaw riċentament ġabra ta’ poeżija ta’ Immanuel Mifsud bit-titlu ta’ The Play of Waves.

 

 

19:00-20:00 – Il-kittieb Irlandiż Dave Rudden

Dave Rudden huwa l-awtur tat-triloġija Knights of the Borrowed Dark li rebħet premji letterarji, kif ukoll tar-rumanz Twelve Angels Weeping li hu parti mill-antoloġija Doctor Who. Tkellem f’aktar minn 500 skola u librerija mifruxa fi tliet kontinenti, iħobb il-qatets, l-avventura u jeżalta ruħu jkun krudili mal-karattri tfal fittizji tiegħu.

 

 

 

 

 

 

 

 

 

 

 

 

 

12:00-13:00 – L-illustratur Steve Scicluna (Malta, Spanja)

Steven Scicluna (1984) huwa artist li jaħdem fl-ispazji bejn l-arti, l-illustrazzjoni u d-disinn grafiku. Wara li studja fir-Renju Unit, illum huwa bbażat ġo Valencia, Spanja.

B’esperjenza fil-pittura, l-iskultura, id-disinn grafiku, l-arti tal-graffiti u l-illustrazzjoni, Scicluna jixhed influwenzi minn għadd ta’ dixxiplini, u l-ħidma tiegħu tissejjes fuq is-simboliżmu grafiku u l-ikonografija. Il-qofol ta’ xogħlu huwa ddefinit minn konversazzjoni kontinwa bejn id-dinja ta’ ġewwa u dik ta’ barra, u jiġbed paralleli grafiċi bejn esplorazzjoni spiritwali personali u l-kulturi, l-arkitetturi, il-klimi u l-forom naturali li ssibhom madwarna.

 

18:00-19:00 – Il-kittieba Maltija Loranne Vella

Loranne Vella hija kittieba, traduttriċi u performer Maltija. Bejn l-2007 u l-2009 kitbet it-tliet volumi ta’ Il-Fiddien ma’ Simon Bartolo – kull volum rebaħ il-Premju Nazzjonali tal-Ktieb. Rokit, l-ewwel rumanz tagħha għall-kbar, ġie ppubblikat fost stennija u tifħir f’Marzu tal-2017, u rebaħ il-Premju Nazzjonali tal-Ktieb fl-2018. Tgħix Brussel fejn tmexxi grupp interdixxiplinarju ta’ arti performattiva jismu Barumbara Collective. L-aktar performance riċenti tal-grupp – Verbi: mill-bieb ’il ġewwa – kienet ibbażata fuq il-ġabra ta’ novelli ta’ Vella mill-bieb ’il ġewwa, li se tiġi ppubblikata f’Novembru ta’ dis-sena minn Ede Books.

L-‘Inkontri Letterarji Qosra’ se jkunu qed isiru waqt il-Festival Nazzjonali tal-Ktieb bejn l-Erbgħa 6 ta’ Novembru sas-Sibt 9 ta’ Novembru fl-Author’s Hub, Sala Sagra Infermerija

Il-Festival Nazzjonali tal-Ktieb 2019 se jsir Dar il-Mediterran, il-Belt, mill-Erbgħa 6 ta’ Novembru sal-Ħadd 10 ta’ Novembru. Il-programm tal-avvenimenti kollha se jkun qed jitqassam f’kull dar f’Malta u Għawdex fil-ġimagħtejn li ġejjin.

 

Share Article