Ħniex

Lil Luna Luul

Hemm ħniex fin

                             iħaffer ħafif il-ħofor

                                                                f’qalb pajjiżna jixheb u jogħlob …

ħniex li ma narawhx avolja nbiddlu n-nuċċalijiet:

                                                                                  ‘mma narawh fl-infern tiegħek

                                                                                                         bla ħoss u jħeġġeġ ħajtek ħuġġieġa.


Nisimgħuk tirrakkonta tħajjarna niftakru

                                                                      fix-xaħam żejjed imrambel f’ruħna.

Ixxennaqna għal għamla ta’ ħniex jitħanxel

                                   li jeħġem ix-xaħam u jeħġem sa jgerrem anki l-lega tat-tiżliġ

                                                 mar-rita li xi darba kienet limpida,

                                                                      li tant għandna bżonn tkun limpida.


Imbagħad hemm il-ħniex irqiq irqiq

                                                               tal-uġigħ jinbaram kattiv f’forma ta’ fjuri jfuħu jiffjorixxu

                                                                                            li qalbek żagħżugħa tnibbet,

                                                                                                         u aħna nippruvaw nifhmu x’jiġifieri:

ommok arrestata għalxejn b’xejn mill-militar,

                                                                              u sena sħiħa kkalzrata lilhinn minnek;

missierek imkeċċi għalxejn b’xejn mix-xogħol

                                                                             mill-bażużli tal-gvern korrott s’għarqubu;


il-ħarbien – mixi fuq mixi mill-Eritrea sas-Sudan;

                                                                                    eluf ta’ nakfa għall-karozza

mis-Sudan għas-Sahara sal-fruntiera,

                            w eluf għall-but tal-coyote mqit li sarmek fil-Libja,

w għad-dgħajsa tal-ħniena b’mija u sebgħin ħolqien t’Alla

                                                                                                  bla ħobż u bla ilma

                                   sakemm ħbiebek u qrabatek tgħannqu

                                                                      wieħed wara l-ieħor, waħda wara l-oħra,

                            mal-qroll tal-qiegħ mediterranju,

                                   sakemm wasalt hawn, kważi mejta, f’dil-gżira tal-ħofor

                                                 fejn ninnegaw miżegħda ħniex imħaxxen iħannex ruħna;
                                                                             fejn inbiddlu n-nuċċalijiet, nibqgħu ma narawx ċar.


                                                               Ċar id-dmugħ f’għajnejk

                                                               int u tirrakkonta dan kollu,

                                                                         għażiża Luna.