Xow teatrali għall-istudenti tal-primarja, ibbażat fuq il-kotba rebbieħa tal-Premju Terramaxka u kkurat mill-komiku Steve Hili u l-grupp ta’ atturi tiegħu. Niltaqgħu ma’ Ċetta, tifla normali li ma’ kull ktieb li taqra tikseb poteri speċjali. Flimkien mal-ħabib tagħha, l-imqareb Dudu tal-Kotba, Ċetta ma tixba’ qatt taqra! Darba waħda, fir-raħal fejn tgħix jitfaċċa Wiper il-kattiv li jibda jiżvojtja l-kotba mill-kliem kollu ta’ ġo fihom! Ċetta trid tara x’se tagħmel. Bil-għajnuna ta’ awtur magħruf (u l-udjenza!), jirnexxilha tfassal pjan biex tirbaħ lil Wiper u ssir it-Tifla Stupenda tal-Kotba.
