Home / Il-Fond Malti tal-Ktieb
Il-Fond Malti tal-Ktieb joħroġ kull sena għal kategoriji differenti ta’ sottomissjonijiet eliġibbli li jkunu għadhom f’fażi ta’ proġett. Mindu twaqqaf fl-2015 il-Fond baqa’ jkollu rwol importanti fit-tkabbir kulturali tal-industrija lokali tal-kotba, billi jwieżen finanzjarjament lill-pubblikaturi u l-awturi sabiex jippubblikaw xogħolhom.
Il-fond allokat għall-2025 huwa €135,000, mifrux fuq il-ħames fergħat li ġejjin:
Kull applikazzjoni li tingħata l-fond tista’ tirċievi finanzjament sa 100% tal-ispejjeż tal-proġett, b’massimu ta’ €5,000 għal kull għotja, b’eċċezzjoni għall-Għotjiet għat-Traduzzjoni ta’ Silta minn Ktieb bħala Pitch li għandha massimu ta’ €500.
L-għotjiet jingħataw wara proċess kompetittiv tal-applikazzjoni mħaresd minn bord indipendenti tal-aġġudikazzjoni, li mbagħad jara kif l-aħjar jitqassmu l-fondi skont il-proġetti preżentati sabiex isir l-aħjar użu tagħhom.
Is-sottomissjonijiet għall-Fond Malti tal-Ktieb 2025 miftuħin bejn it-18 ta’ Marzu u l-20 ta’ Mejju. Ir-riżultati jitħabbru fil-15 ta’ Lulju.
Dil-fergħa twieżen proġetti ta’ pubblikazzjoni ta’ xogħlijiet oriġinali ta’ finzjoni, fosthom rumanzi, poeżiji, drama, u rumanzi grafiċi, kif ukoll letteratura mhux fittizja bħal bijografiji. Xogħol akkademiku bħal monografiji, ġabriet editjati u edizzjonijiet kritiċi eliġibbli wkoll.
Aktar informazzjoni fil-linji-gwida.
Dil-fergħa twieżen il-pubblikazzjoni ta’ edizzjonijiet ġodda ta’ kotba li ma jkunux fl-istampa.
L-għan hu li jimtela n-nuqqas li jeżisti bejn il-ħtieġa li jibqgħu jinqraw il-klassiċi Maltin u kotba oħra li jiffurmaw parti mill-kanonu letterarju Malti, u n-nuqqas ta’ disponibbiltà tagħhom fil-ħwienet tal-kotba.
Dil-fergħa twieżen proġetti ta’ traduzzjoni ta’ letteratura Maltija fi kwalunkwe lingwa oħra.
Dan jinkludi wkoll antoloġiji ta’ xogħol oriġinali fittizju jew mhux fittizju minn awtur jew awturi Maltin, kif ukoll il-pubblikazzjoni ta’ xogħol bil-Malti lejn l-Ingliż.
Dil-fergħa twieżen proġetti ta’ traduzzjoni ta’ xogħlijiet letterarji jew akkademiċi internazzjonali lejn il-lingwa Maltija.
IL-PROĊESS TAL-APPLIKAZZJONI
L-applikazzjonijiiet għall-Fond Malti tal-Ktieb jittellgħu online.
Aqra bir-reqqa l-linji-gwida u r-regolamenti tal-fergħa li se tapplika għaliha qabel iddaħħal il-proġett tiegħek, sabiex tkun ċert li żżomm mal-kriterji tal-eliġibbiltà u l-proċess tal-evalwazzjoni. Tista’ taċċessa kampjun tal-formola tal-applikazzjoni u r-rendikont baġitarju bħala referenza fis-sezzjoni tal-materjal importanti.
Ara li jkollok ippreparati d-dokumenti mandatorji – kif ukoll dawk mhux mandatorji imma li jsaħħu l-applikazzjoni tiegħek – sabiex ittellagħhom fis-sistema tal-applikazzjoni online.
Agħfas fuq il-buttuna “APPLIKA ISSA” fuq il-lemin in-naħa ta’ fuq ta’ dil-paġna.
Jekk issib xi diffikultà ċempel l-uffiċċju tagħna fuq +356 27131574 jew ibgħat email lil Matthew Borg fuq matthew.borg@ktieb.org.mt
Meta tapplika tirċievi notifika b’email li kollox sew.
Tista’ teditja l-applikazzjoni tiegħek wara li tkun daħaltha. Biex tagħmel dan, trid tibagħtilna talba għall-editjar mill-portal. Erġa’ lloggja bil-kont tiegħek tas-Submittable, mur fuq l-applikazzjoni, u agħfas ‘Edit’. Talbiet simili jibqgħu jiġu aċċettati sal-għeluq tas-sottomissjonijiet.
Il-lista tal-proġetti li jingħataw il-fondi tkun ippubblikata tmien ġimgħat wara l-għeluq tas-sottomissjonijiet.
Jekk il-proġett tiegħek jingħata l-fondi, 50% tal-ammont jingħadda meta tiffirma l-kuntratt tal-benefiċjarji.
Meta tlesti l-proġett, il-50% l-oħra jgħaddu għandek wara li tissottometti żewġ kopji stampati tal-ktieb, ir-rapport finali u r-rendikont baġitarju finali, li jridu jiġu approvati mill-KNK.
Jekk għandek xi diffikultà jew trid tikkonsulta magħna dwar il-Fond, ibgħat email lil Matthew Borg fuq matthew.borg@ktieb.org.mt jew ċemplilna fuq 356 27131574 bejn it-Tnejn u l-Ġimgħa mid-9am sal-4pm.