Home / Malta Book Centre
Iċ-Ċentru Malti tal-Ktieb, maħsub bħala dar tal-letteratura kontemporanja fil-qalba tal-Belt Valletta, hija inizjattiva kulturali ambizzjuża tal-Kunsill Nazzjonali tal-Ktieb. F’palazz storiku tas-seklu 16 li qed jiġi rrestawrat, iċ-Ċentru se jservi bħala qafas dinamiku għal-letteratura bl-għan li jrawwem l-ekosistema letterarja għanja ta’ Malta. Il-post se jkun fih esperjenza interattiva tal-ktieb ta’ natura edukattiva, ħanut tal-kotba, ħanut tal-kafè letterarju, kmamar għall-qari, u spazji versatili għal workshops u tnedijiet tal-kotba.
Msejjes f’viżjoni tat-trawwim tat-talent kif ukoll iċ-ċelebrazzjoni tal-letteratura Maltija, iċ-Ċentru se jipprovdi pjattaforma għal skambji kreattivi filwaqt li jippreserva l-wirt letterarju tagħna. Permezz ta’ programm ta’ avvenimenti u attivitajiet pubbliċi tul is-sena kollha li għandhom l-għan li jwieżnu l-industrija tal-kotba lokali u jinvolvu udjenzi diversi, iċ-Ċentru se jkun spazju għall-iskambju kreattiv u żvilupp professjonali.
Lilhinn minn spazju, iċ-Ċentru Malti tal-Ktieb jaspira li jkun punt ta’ referenza kulturali, li jiżgura li l-letteratura tibqa’ fil-qalba tal-ħajja kreattiva u intellettwali ta’ Malta.
Iċ-Ċentru Malti tal-Ktieb se jkun qed jinsab f’binja storika fil-qalba tal-Belt Valletta, fi Triq iz-Zekka. Il-binja bħalissa qed tgħaddi minn rinnovamenti estensivi b’disinn għal spazju multifunzjonali li għandu l-għan li jintroduċi ħajja ġdida lill-bini storiku kif ukoll li joħloq ċentru kulturali ġdid fil-belt kapitali.
Il-binja hija mifruxa fuq erba’ livelli, li jikkombinaw funzjonijiet multipli u jinkludu spazji fil-kantina u żona fuq il-bejt. Fil-pjan terran, ħanut tal-kotba, żona ta’ akkoljenza u kafetterija joħolqu ambjent informali madwar bitħa interna. Il-kantina hija maħsuba bħala spazju intimu għall-qari li jservi wkoll bħala post għal avvenimenti u laqgħat iżgħar.
Fl-ewwel sular, il-viżitaturi se jsibu spazju ta’ esibizzjoni adattabbli li jospita esperjenza interattiva madwar il-ktieb, flimkien mal-uffiċċji amministrattivi tal-Kunsill Nazzjonali tal-Ktieb. Il-bejt qed jiġi addattat wkoll f’żona ta’ avvenimenti, li toffri veduta panoramika unika fuq il-Belt Valletta.
Fit-tisħiħ tal-karattru oriġinali tal-bini, struttura tal-ħġieġ semi-trasparenti se tkun qiegħda tinfrex mal-faċċata tal-bitħa interna mill-pjan terran sas-saqaf, li sservi kemm bħala karatteristika arkitettonika kif ukoll bħala element li jgħaqqad id-disinn.
Ir-riġenerazzjoni ta’ 8, Triq iz-Zekka ġejja mill-ħtieġa li l-pubbliku lokali u l-viżitaturi jingħataw spazju fejn jkunu jistgħu jerġgħu jingħaqdu mal-letteratura u jsibu ispirazzjoni intellettwali u serħan personali fost ir-ritmu mgħaġġel tal-ħajja ta’ kuljum.
Fl-istampa: Times 2 – A new home for literature – Awwissu 9, 2023