Ingħaqad mal-Aġenzija għall-Enerġija u l-Ilma għal sessjoni ta’ qari li se ssaħħrek dwar il-konservazzjoni tal-ilma u l-bijodiversità! It-tfal jistgħu jagħżlu li jaqraw flimkien minn wieħed minn dawn il-kotba: Osbert and Friends (8–12-il sena); Il-Kavallier Għatxan (8–10 snin); L-Istejjer ta’ Zoe u d-Dragun Waqt Żmien il-Pandemija tal-Covid (6–8 snin).
Osbert and Friends (8–12 snin) 🇬🇧
Osbert, żrinġ miżbugħ li jgħix ġewwa Wied il-Qlejgħa, jgħallimna dwar l-abitat tiegħu, u l-bijodiversità f’dal-wied.
Il-Kavallier Għatxan (8–10 snin) 🇲🇹
Din l-istorja toħodna lura fi żmien il-Kavallieri fejn niltaqgħu mal-Kavallier Jean de Villers, l-akbar ħabib tal-Gran Mastru Alof de Wignacourt. Jean kien ingħata kariga importanti immens, dik li jieħu ħsieb il-provista tal-ilma tal-Gżejjer Maltin. B’hekk naraw lil Jean jinvestiga l-bjar, il-ġwiebi, l-ispieri u l-mini minħabba n-nuqqas t’ilma. Infatti l-Gran Mastru, bl-għajnuna ta’ Jean, mexa fuq ir-rapport tal-inġinier Padre Tomasucci li rrakkommanda li jinbnew l-akwadotti, proġett fejn l-ilma ta’ kwalità għolja jinżel mir-Rabat u Ħad-Dingli u jasal fil-funtana barra l-Belt Valletta. B’hekk Jean żdiedlu x-xogħol peress li ta’ sikwit kien jiċċekkja x-xogħlijiet fuq dan il-proġett importantissimu għall- Gżejjer Maltin.
L-Istejjer ta’ Zoe u d-Dragun waqt Żmien il-Pandemija tal-Covid (6–8 snin) 🇲🇹
Għalkemm it-titlu tal-ktieb isemmi l-pandemija li issa l-eqqel tagħha għadda, Zoe u d-Dragun huma żewġ karattri illi jgħinu lill-għalliema waqt il-lezzjonijiet tagħhom fiċ-Ċentru Għajn. Permezz ta’ dawn iż-żewġ karattri t-tfal jitgħallmu dwar iċ-ċiklu tal-ilma, l-ilma virtwali, kif ukoll x’jista’ wieħed jagħmel biex jieħu ħsieb din ir-riżorsa tant prezzjuża illi hija tant skarsa fil-Gżejjer Maltin.
