John A. Bonello twieled fl-1976 u jgħix Ħad-Dingli fid-dar tan-nanniet. Fost il-kotba li kiteb hemm triloġija Il-Logħba tal-Allat (It-Tielet Qamar (i), L-Aħħar Ħolma (ii) u Is-Sitt Aħwa (iii)), id-duwoloġija Unus Mundus (Fil-Mergħat tal-Impossibbli (i) u Jien, Wieħed Minnhom (ii)) u s-sensiela investigattiva għat-tfal Irvin Vella, Investigatur Virtwali. Fl-2017 għamel esperiment meta ppubblika l-istess storja b'żewġ lingwi biex jara r-reazzjoni tan-nies. Dawn iġibu l-isem ta' It-Taár u The Taár. Il-verżjoni l-aktar mibjugħa kienet dik bil-Malti. The Transmissions kien esperiment ieħor li għamel, fejn fl-2016 ippubblika storja online miktuba f'60 episodju ta’ 100 kelma kull wieħed. Din l-istorja illum tinsab fuq Amazon bħala e-Book. Sa minn meta beda jikteb, John rebaħ il-Premju Nazzjonali tal-Ktieb seba’ darbiet, kif ukoll ingħata Ġieħ Ħad-Dingli. Jaħdem bħala editur online matul il-ġurnata u jikteb matul il-ħin liberu tiegħu. Iħobb il-qari, speċjalment il-ġeneru tal-fantażija, u fan kbir ta' Star Wars. Dilettant tal-agrikoltura, u jħobb ħafna l-logħba tat-table tennis.