Clare Azzopardi tgħix bejn pajjiż u ieħor. Tqatta’ ħafna ħin tikteb għat-tfal u għall-kbar. Għallmet il-letteratura Maltija għal 24 sena u għal dawn l-aħħar tmien snin kienet ukoll il-Kap tad-Dipartiment tal-Malti fil-Junior College. Rebħet ħafna premjijiet bil-kotba tagħha u ħafna mix-xogħol tagħha, fosthom Kulħadd ħalla isem warajh u Castillo, inqaleb għal lingwi oħra bħall-Ingliż, it-Taljan, l-Għarbi, is-Sloven u l-Ungeriż.

Leanne Ellul tgħallem il-Malti u tiggwida lill-istudenti fl-ewwel passi tagħhom fil-kitba. Tikteb kemm poeżija kif ukoll proża. Ħarġet kollezzjonijiet ta' poeżiji dwar kmamar koħol, spazji bojod, u siġar ħodor. L-ewwel rumanz tagħha għaż-żgħażagħ kien Gramma u din is-sena ħareġ it-tieni rumanz rebbieħ tal-Premju Rumanzi għaż-Żgħażagħ: be;n il-kmiem. Ellul tifforma parti minn numru ta’ entitajiet li għandhom il-lingwa u l-kultura Maltija fil-qalba tagħhom, fosthom Inizjamed u Fondazzjoni HELA.