Issa ilek tikteb għal xi żmien. Jew forsi tixtieq tikteb dawk l-istejjer kollha li ilhom iduru f’moħħok. Iżda xi ngħidu dwar ir-reviżjoni u l-editjar? Kemm huma importanti u kif tista’ tibbenifika minnhom? Ingħaqad mal-editriċi rebbieħa ta’ diversi premji, Ann VanderMeer, għal dan il-workshop dwar l-editjar fejn tista’ titgħallem dwar is-servizzi differenti li editur jista’ jipprovdilek biex tirfina l-finzjoni tiegħek kif ukoll kif tinkorpora r-reviżjoni fil-proċess tal-kitba tiegħek. F’dal-workshop qed tistenniek taħlita ta’ lekċers qosra ma’ eżerċizzji tal-kitba divertenti. Ma jonqosx ħafna logħob bil-kitba li se jurik kif tista’ tirrevedi l-finzjoni tiegħek miegħek innifsek jew m’oħrajn. Il-parteċipanti se jitgħallmu wkoll kif taħdem m’edituri professjonali u professjonisti oħrajn fid-dinja tal-pubblikazzjoni. 

Trid tirreġistra għal dan il-workshop bla ħlas. Ninkoraġġixxu lill-parteċipanti prospettivi biex jibbukkjaw malajr peress li l-postijiet huma limitati, u se jiġu rriservati fuq bażi ta’ min japplika l-ewwel jinqeda l-ewwel.

Dwar l-EditriċiAnn VanderMeer hija editriċi u antoloġista rebbieħa ta’ diversi premji. Bħalissa qed isservi ta’ editriċi tal-akkwisti għal Reactormag.com. Rebħet il-Premju Hugo meta kienet tmexxi l-editorija ta’ Weird Tales. Fost diversi nominazzjonijiet, rebħet il-Premju Dinji tal-Fantasija, il-Premju Locus u l-Premju Ingliż tal-Fantasija għal The Weird: A Compendium of Strange and Dark Stories. Għallmet numru sabiħ ta’ workshops tal-kitba, fosthom il-Yale University Writers Conference, Clarion, Odyssey u Shared Worlds (kamp tal-kitba għaż-żgħażagħ). Tat anki seminars dwar il-kreattività lil udjenzi varji, mil-librari tal-istat tal-Arizona sa Blizzard Entertainment. Ġiet intervistata għal WIRED.Com, NPR, BITCH magazine, The Weather Channel u bosta aktar. Proġetti oħra jinkludu Best American Fantasy, tliet antoloġiji Steampunk, u l-ktieb umoristiku The Kosher Guide to Imaginary Animals. L-aktar antoloġiji reċenti tagħha jinkludu The Time Traveler’s Almanac, Sisters of the Revolution, u The Bestiary, antoloġija b’finzjoni u arti oriġinali.