Introduzzjoni Prattika għal-Legatura tal-Kotba (Età 14+): Workshop minn Glen Calleja – KNK – It-Teatru /

Ingħaqad mal-legatur, pubblikatur u awtur Glen Calleja għal workshop dwar is-sengħa tal-legatura tal-kotba.  Is-sessjoni tinkludi informazzjoni dwar tekniki artiġjanali, materjali u d-disinn kontemporanju tal-kotba. Il-parteċipanti jkollhom l-opportunità jmiddu jdejhom biex jagħmlu ktieb żgħir. Trid tinkiteb għal dis-sessjoni, u m’hemmx ħlas għaliha. Irreġistra hawn taħt.

Glen Calleja huwa legatur u artist tal-kotba. Calleja huwa l-fundatur ta’ Kotba Calleja, legatorija tal-kotba ġewwa r-Rabat (Malta) fejn joffri diversi servizzi. Huwa japplika t-teknika u metodi tal-legatorija tradizzjonali mal-prinċipji tad-disinn kontemporanju biex joħloq kotba uniċi jew edizzjonijiet żgħar ta’ pubblikazzjonijiet partikolari. Huwa jirriċerka u joħloq prodotti maħduma mill-karta, minn bwieqi ta’ karta riċiklata sa oġġetti oħra. Calleja beda l-vjaġġ tiegħu f’din is-sengħa mad-disinjatriċi rinomata Lori Sauer (BINDING re:DEFINED) u sal-lum għadu student tagħha. Huwa mexxa diversi workshops fuq il-legatorija u x-xogħol bil-karta l-aktar madwar il-prinċipji ta’ “aħseb billi tagħmel” u madwar il-mistoqsija ta’ x’jagħmel ktieb.