Stejjer li Qatt ma Qrawlek – Teatru Malta 🇲🇹

Tmien stejjer Maltin, irrakkontati mill-ġdid permezz tal-vuċi u l-ħoss.

‘Stejjer li Qatt ma Qrawlek’ hija inizjattiva ta’ Teatru Malta, taħt il-kappa ta’ Teatru Redifjuxxin, żviluppata mal-Kunsill Nazzjonali tal-Ktieb. Il-proġett jagħżel tmien stejjer qosra minn awturi Maltin u jagħtihom ħajja ġdida permezz tal-vuċi u l-interpretazzjoni tal-ensemble ta’ Teatru Malta.

L-għażla finali tinkludi xogħlijiet ta’ Kurt Borg, Clare Azzopardi, Immanuel Mifsud, Leanne Ellul, Nadia Mifsud, Lara Calleja, Loranne Vella u Keith Borg. Għalkemm l-istejjer ġejjin minn awturi u ġabriet differenti, mill-għażla tagħhom toħroġ tema komuni: il-ħtieġa fundamentali tagħna li nibnu rabtiet sinifikanti ma’ ħaddieħor. Il-proġett ‘Stejjer li Qatt ma Qrawlek’ jesplora l-intimità u l-kapaċità tiegħu li jimliena, isawwarna u jweġġagħna, filwaqt li jistaqsi x’jiġri meta x-xewqa għall-intimità tieħu xejra spjaċevoli. Stejjer li Qatt ma Qrawlek għalhekk joħloq pont bejn il-letteratura u t-teatru, u joffri mod ġdid kif stejjer Maltin jiġu mismugħa, interpretati u esperjenzati — permezz tal-vuċi, il-ħoss u l-immaġinazzjoni.

L-istejjer se jiġu rrekordjati minn Albert Garzia, li se jaħdem mill-qrib mal-ensemble biex kull test isib il-vuċi, ir-ritmu u l-atmosfera partikolari tiegħu. Garzia se joħloq ukoll mużika oriġinali apposta għall-podcasts, li tgħaqqad l-istejjer u tagħti lill-kollezzjoni identità awdjo komuni. James Baldacchino se jkun responsabbli mill-mastering tar-reġistrazzjonijiet qabel ma dawn ikunu disponibbli għas-semmiegħa permezz ta’ diversi pjattaformi.

Post: Ħdejn Is-Sala tal-Kittieba, Ir-Rokna tal-Ktieb, Stand numru 9