L-Esebituri

Test

Agenda Bookshop huwa wieħed mill-aktar bejjiegħa tal-kotba u tal-fuljetti importanti f’Malta. Il-ħwienet tal-Agenda jinsabu f’postijiet ċentrali u ewlenin f’Malta, fosthom l-Ajruport Internazzjonali ta’ Malta u stabbilmenti ewlenin tax-xiri. Għand Agenda Bookshop issib l-aqwa u l-aħħar kotba li kienu suċċess madwar id-dinja, kif ukoll għażla wiesgħa ta’ titli ġodda kuljum. L-għażla ta’ kotba għand Agenda tħabbatha ma’ dik li joffru ħwienet tal-kotba ewlenin fir-Renju Unit.

Il-Komunità Musulmana Ahmadiyya Malta hija organizzazzjoni reliġjuża. Tinkoraġġixxi djalogu, paċi, u rispett bejn dixxipli ta’ twemmin differenti. Il-Komunità Ahmadiyya Musulmana tippromwovi l-edukazzjoni, l-għarfien u l-qari tal-kotba, u għal dan l-għan il-Komunità tippubblika kotba bil-Malti. Għal din ir-raġuni, il-komunità tippubblika kotba u rivista kull xahar bl-isem ta’ Id-Dawl fl-ilsien Malti, anki biex isservi l-lingwa nazzjonali. Il-Komunità Ahmadiyya Musulmana hija magħrufa wkoll għas-sehem attiv tagħha f’ħidma karitatevoli u filantropika. Il-motto tagħha huwa: “Imħabba għal Kulħadd, Mibegħda għal Ħadd”. 

Aphroconfuso huwa ġurnal letterarju bil-Malti online u dar tal-pubblikazzjoni. Nippubblikaw esejs, stejjer, poeżiji, djarji, traduzzjonijiet u xogħlijiet letterarji li mhux faċli tikklassifikahom, b’enfasi fuq l-identità soċjopolitika Maltija, esperjenzi femministi u realtajiet marġinali u queer. Fuq il-podcast ta’ Aphroconfuso nippubblikaw verżjoni awdjo ta’ ħafna mix-xogħol li jidher fil-ġurnal, kif ukoll taħditiet mal-kittieba tagħna. L-ewwel ktieb stampat tagħna huwa Antoloġija 1, li ħareġ f’Ottubru 2024, u Antoloġija 2 se jitnieda waqt il-Festival. Ippubblikajna wkoll Qarn ta’ Romeo Roxman Gatt, u Bur Mgħeż ta’ Omar N’Shea huwa ppjanat għall-2026.

Il-Kunsill Malti għall-Arti huwa l-aġenzija nazzjonali għall-iżvilupp u l-investiment fis-setturi kulturali u kreattivi. L-għan prinċipali tal-KMA huwa li jiffinanzja, jissapportja u jippromwovi s-setturi kulturali u kreattivi ta’ Malta.

BDL Distribution ilhom imwaqqfin mill-1990, u f’daż-żmien saru d-distributur ewlieni ta’ pubblikazzjonijiet fil-ħwienet tal-kotba u ħwienet oħra f’Malta u Għawdex. BDL Publishing, it-tieni pilastru tal-kumpanija, tispeċjalizza f’kotba ta’ kwalità li jvarjaw minn letteratura fittizja għat-tfal għal kotba prestiġjużi tal-Melitensia. It-tielet pilastru tal-kumpanija huwa BDL Retail. Il-ħanut ta’ San Ġwann jinkludi ġabra estensiva tal-aqwa kotba fejn wieħed jista’ jfittex u jixtri direttament minn għażla ta’ ’l fuq minn 20,000 titlu.

Id-dar tal-pubblikazzjoni Bonfirraro ilha indipendenti mill-1986, u rnexxielha mill-ewwel tiddistingwi ruħha bis-saħħa ta’ produzzjoni ta’ kotba fittizji ta’ kwalità, kif ukoll għall-enfasi tagħha fuq veritajiet storiċi mħabbra għall-ewwel darba, u sensiela ta’ esejs u investigazzjonijiet dwar suġġetti ta’ impatt soċjali kbir. L-orjentazzjoni ta’ din id-dar tal-pubblikazzjoni, li xxaqleb lejn tip ta’ letteratura “impenjattiva”, tiddetermina l-pubblikazzjonijiet kuraġġjużi li joħduha qatta’ bla ħabel kontra kull tip ta’ inġustizzja, bl-għan li jikontribwixxu lejn il-ġlieda għall-affermazzjoni tal-libertà, valur li ma tistax taħarbu. B’serjetà, bi spirtu ta’ sagrifiċċju u f’konformità mal-prinċipju “L-istorja tagħna hija l-futur ’il fejn interrqu…,” Bonfirraro tħobb tħares fit-tul, u tosserva dak li hu lil hinn, “’il barra mill-fruntiera,” biex tisfida lilha nnifisha u tirbaħ l-isfidi li għall-ewwel jaf jidhru impossibbli.

Bookends huwa ħanut il-Fgura li joffri kotba ġodda bi prezzijiet ferm iktar baxxi mill-prezzijiet oriġinali tagħhom. Għandek issib għażla kbira ta’ kotba fuq suġġetti differenti. Fis-suq lokali Bookends kiseb reputazzjoni qawwija, kemm għall-kwalità tal-kotba, kif ukoll għall-prezzijiet irħas ħafna.

Faraxa Publishing, dar tal-pubblikazzjoni li twaqqfet f’Malta minn Joanne Micallef fl-2011, tispeċjalizza fi traduzzjonijiet letterarji u mhux letterarji, filwaqt li tilqa’ wkoll firxa wiesgħa ta’ ġeneri oħra. Il-missjoni tal-kumpanija hija li tintroduċi lill-qarrejja Maltin ma’ letteratura diversa u mill-aħjar minn madwar id-dinja biex b’hekk tagħni x-xena letterarja lokali.

Fondazzjoni Sagħtar hija għaqda volontorja independenti u awtonoma bla ebda affiljazzjoni politika, li l-għan ewlieni tagħha hu li sservi fis-soċjal u l-edukattiv qalb l-edukaturi u l-istudenti f’Malta u Għawdex. L-iskopijiet prinċipali tal-Għaqda huma: li tikkontribwixxi għat-tisħiħ tal-irwol professjonali tal-edukaturi u l-avvanz tal-istudenti; li tipprovdi opportunitajiet għat-titjib professjonali tal-edukaturi; li tniedi proġetti u torganizza attivitajiet bl-għan li jipprovdu taħriġ professjonali lill-edukaturi u jwittu t-triq għall-istudent; li toħloq u tippubblika materjal edukattiv.

Il-Fondazzjoni Wirt Artna (FWA) ġiet stabbilita fl-1987 u hija organizzazzjoni volontarja u mhux governattiva li tispeċjalizza fil-preservazzjoni u l-interpretazzjoni tal-wirt kulturali għani ta’ Malta. Il-FWA tidħol ukoll fil-wirt militari u tieħu ħsieb siti storiċi diversi mifruxin tul sekli tal-istorja Maltija. Fost dawn is-siti miftuħa għall-pubbliku nsibu fortifikazzjonijiet tax-xtut u installazzjonijiet militari mis-Seklu Għoxrin.

Il‐German‐Maltese Circle huwa l-eqdem istitut kulturali f’Malta li jindirizza r-relazzjonijiet bejn Malta u r-Repubblika Federali tal-Ġermanja. Huwa ċ-ċentru stabbilit u awtorizzat biex joffri l-korsijiet tal-lingwa Ġermaniża u l-eżamijiet f’isem il-Goethe Institute f’Malta. 

Id‐Dipartiment tal‐Ġermaniż huwa parti mill‐Fakultà tal‐Arti fl‐Università ta’ Malta. Id‐Dipartiment joffri l‐opportunità li l‐istudenti jistudjaw il‐Ġermaniż f’firxa ta’ korsijiet: korsijiet full‐time fl-ewwel grad u dawk suċċessivi (BA Unuri bil‐Ġermaniż, BA Ġenerali bil‐Ġermaniż, MA u PhD bil‐Ġermaniż), korsijiet tal‐lingwa part‐time għal‐livelli kollha tal‐lingwa (Ċertifikat/Diploma fil‐Profiċjenza tal‐Lingwa), u korsijiet part‐time filgħaxija għall‐pubbliku ġenerali (Ċertifikat/Diploma bil‐Ġermaniż).

Heritage Malta Publishing hija t-taqsima tal-pubblikazzjoni fi ħdan l-Aġenzija Nazzjonali tal-Mużewijiet, il-Konservazzjoni u l-Patrimonju Kulturali. Tipproduċi firxa ta’ xogħlijiet li jolqtu udjenzi diversi u li jkopru l-ispettru kollu tal-patrimonju tanġibbli u intanġibbli tal-gżejjer Maltin.

L-Inspire tistinka lejn it-trasparenza, il-kontabbiltà u l-innovazzjoni. Il-governanza tagħna tassigura integrità f’kull deċiżjoni li nieħdu, u l-immaniġġjar tal-finanzi jimmassimizza l-impatt tagħna. B’saħħet it-tim dedikat tagħna u s-sapporters ġenerużi, ftit ftit qed noħolqu dinja fejn individwi b’abbiltajiet differenti jkunu jistgħu jilħqu l-milja tagħhom.

Bħala l-Uffiċċju Kulturali tal-Ambaxxata Taljana f’Malta, l-Istitut Kulturali Taljan fil-Belt Valletta jagħmel parti mill-Ministeru għall-Affarijiet Barranin u l-Kooperazzjoni Internazzjonali tal-Italja. Il-missjoni primarja tal-Istitut, bħala l-emblema ta’ patrimonju b’għeruq fondi fil-Gżejjer Maltin, huwa li jippromwovi l-lingwa, l-arti u l-kultura Taljana. Dan jissarraf fl-organizzazzjoni u l-promozzjoni t’attivitajiet fosthom esebizzjonijiet, kunċerti, drammi, u konferenzi. Madanakollu, l-Istitut għandu wkoll it-tir li jinteraġixxi mal-qafas kollu tal-universitajiet, ċentri ta’ studji u istituzzjonijiet edukattivi kemm f’Malta kif ukoll fl-Italja.

Il-kreattività, l-innovazzjoni, il-kwalità għolja u l-interess lejn il-qarrejja huma fost l-aktar kunsiderazzjonijiet importanti għal Kite Group. Permezz ta’ kull ktieb, Kite Group jimmira li joħloq esperjenza li tagħti gost lill-qarrejja. Dan jgħodd kemm għal min ifittex il-viżiv u anki għal min ifittex il-qari. Fost il-kotba li ġew ippubblikati minn din id-dar tal-pubblikazzjoni, rebbieħa ta’ diversi premjijiet, hemm dawk dwar l-arti, il-kultura, bijografiji, stejjer qosra, kotba t’umoriżmu, fotografija, arkitettura, liġi u l-istorja ta’ pajjiżna. Kite Group joffri servizz lill-qarrejja u lil kull min irid jippubblika ktieb.

Midsea Books Ltd. u Klabb Kotba Maltin huma meqjusa fost il-pubblikaturi ewlenin f’Malta. Id-dar tal-pubblikazzjoni twaqqfet minn Pawlu Mizzi fl-1969 u Il-Gaġġa kien l-ewwel ktieb li ġie mitbugħ fl-1971. Midsea Books u s-sussidjarji tagħha Klabb Kotba Maltin u Heritage Books jippubblikaw ġeneri differenti ta’ kotba, minn dawk għat-tfal, rumanzi u novelli, sa storja u kotba tal-arti dwar Malta. Bosta mill-kotba ppubblikati huma rebbieħa ta’ premjijiet jew ġew imsemmija fi premjijiet letterarji kemm Malta kif ukoll barra.

Il-Kollezzjoni Traduzzjonijiet Letterarji (KTL) hi sensiela ta’ xogħlijiet letterarji ta’ awturi Franċiżi tradotti għall-Malti. Is-sensiela bdiet fl-2013 u għadha għaddejja sal-lum il-ġurnata. S’issa, il-KTL tikkonsisti minn 8 pubblikazzjonijiet li tlieta minnhom huma rebbieħa tal-Premju Nazzjonali tal-Ktieb fit-taqsima tat-Traduzzjoni. Fost l-awturi tradotti nsibu lil Marcel Proust, Flaubert u Balzac. L-għan tal-KLT hu li traduzzjonijiet ta’ xogħlijiet letterarji klassiċi jkomplu jaslu għand il-qarrej Malti bil-Malti.

Pubblikaturi u produtturi ta’ kotba artiġjanali u prodotti tal-karta maħduma bl-idejn. L-istorja ta’ Kotba Calleja tibda mill-imħabba għall-karta bħala materjal umli, uniku u versatili. Hija passjoni li tissarraf fi prodotti ta’ kwalità maħduma mill-bidu sal-aħħar f’Malta. Kull parti tal-proċess – kull tinja, kull qtugħ, kull pont ħjata, kull inkollatura – issir bl-idejn, bir-reqqa u bil-paċenzja. Għalhekk uniċi. Kotba Calleja tippubblika letteratura li ma tibżax tesperimenta, li tgħarrex fl-idjoma, fil-vokabularji, fis-sintassi għal xbihat li jagħtu identità ġdida lill-poeżija u r-rumanz Malti. Din id-dar ta’ pubblikazzjoni tirrapreżenta kemm kittieba stabbiliti kif ukoll poeti u rumanziera ġodda.

L-Għaqda tal-Malti – Università hi għaqda studenteska bl-għan li tirrappreżenta l-istudenti tal-Malti f’kull livell. Toffri spazju lil kull min għandu passjoni għall-Malti biex jaħdem għal dil-lingwa b’modi differenti. Tippubblika wkoll il-kitba ta’ studenti, akkademiċi u membri tal-pubbliku fir-rivista Leħen il-Malti, li tmur lura għall-bidu tal-Assoċjazzjoni Maltija. GħMU hija waħda mill-aktar għaqdiet studenteski attivi fl-Università ta’ Malta bl-għan li tippromwovi u tiċċelebra l-lingwa Maltija fost is-setturi edukattivi u professjonali kif ukoll fl-użu tagħha ta’ kuljum.

Fl-1975 is-Soċjetà tad-Duttrina Nisranija magħrufa bħala M.U.S.E.U.M. żviluppat ħanut tal-kotba, illum stabbilit sewwa, bl-isem tal-fundatur tagħha, Librerija Preca. Il-ħanut jispeċjalizza fil-bejgħ ta’ letteratura reliġjuża u riżorsi multimedjali oħra minn bosta mid-djar tal-pubblikazzjoni ewlenin fl-Ewropa, l-Asja u l-Amerika ta’ Fuq. F’Novembru tal-1997 il-ħanut tal-kotba mexa għal żona aktar spazjuża u ddisinjata speċifikament għalih fid-Dar Ċentrali tas-Soċjetà fi Blata l-Bajda, li toffri aċċess aħjar għall-pubbliku ġenerali. Minbarra l-varjetà kbira ta’ kotba spiritwali, Librerija Preca toffri varjetà kbira ta’ tifkiriet Nisranin għall-okkażjonijiet kollha.

Malta Libraries hija l-entità responsabbli għall-Bibljoteka Nazzjonali ta’ Malta, il-Librerija Nazzjonali (Għawdex), il-Librerija Ċentrali Pubblika, il-Librerija Pubblika ta’ Għawdex, il-Libreriji Pubbliċi Reġjonali u Lokali f’Malta u Għawdex u l-Uffiċċju Nazzjonali tal-Bibljografija. Bħala entità, Malta Libraries twaqqfet bl-Att Dwar il-Libreriji Maltin (Att VII tal-2011), flok dak li qabel kien id-Dipartiment tal-Libreriji.

Stabbilit ’il fuq minn 25 sena ilu, Malta Online Bookshop huwa l-ħanut tal-kotba virtwali ewlieni fis-suq lokali li jispeċjalizza fil-pubblikazzjonijiet Maltin. Bi kburija noffru kollezzjoni diversa b’titli kurrenti u aktar min 3,500 xogħol li m’għadux fl-istampa, kif ukoll xogħlijiet rari u antiki, biex b’hekk naqdu lill-entużjasti tal-Melitensia u anki lill-kollezzjonisti. Kommessi biex nagħtu servizz eċċellenti u noffru kunsinna b’xejn għal ordnijiet lokali ’l fuq minn €40, u pustaġġ internazzjonali permezz ta’ posta reġistrata. Pagamenti bil-karti ta’ kreditu ewlenin aċċettati online. Il-missjoni tagħna hi li nippromwovu l-Melitensia għanja ta’ Malta filwaqt li nagħmluha aċċessibbli lil qarrejja u kollezzjonisti madwar id-dinja.

Meli Bookshop joffrey varjetà wiesgħa ta’ kotba, minn finzjoni u letteratura mhux fittizja sa letteratura għat-tfal u letteratura klassika. Meli Bookshop għandu żewġ ħwienet li t-tnejn jinsabu fil-Belt Valletta.

Il-Kunsill Lokali tal-Mellieħa jgħin awturi lokali biex jippubblikaw il-kotba tagħhom bħala parti mis-serje tiegħu ‘Ħannieqa Kotba Melleħin’. Dawn huma ppubblikati bil-Malti jew bl-Ingliż u taħt ġeneri differenti, fosthom letteratura fittizja, mhux fittizja u poeżiji. Il-kunsill huwa kommess biex jgħin awturi mil-lokalità biex jesebixxu x-xogħlijiet tagħhom u jagħmluhom aktar aċċessibli għall-pubbliku ġenerali.

Merlin Library ilu jissupplixxi kotba lill-iskejjel primarji, sekondarji u postsekondarji mill-1978. Wieħed mill-ħwienet li għandna u li jinsab Blata l-Bajda huwa l-uniku ħanut ġo Malta li jġib il-kotba tal-iskola tul is-sena kollha. Issibilna wkoll għażla wiesgħa ta’ materjal għar-reviżjoni għal ħafna mis-suġġetti. Nispeċjalizzaw f’kotba għat-tfal u kontinwament inġibu eluf ta’ kotba għal tfal ta’ bejn it-3 xhur sal-età żagħżugħa. Għandna selezzjoni kbira ta’ kotba fittizji u mhux fittizji u oħrajn ta’ interess ġenerali għall-adulti. Spiss ikollna wkoll offerti speċjali għal tfal li huma membri fil-Wizzies Club. Merlin Library kien l-ewwel li introduċa lill-awturi tal-kotba tat-tfal fl-iskejjel Maltin, b’dawn l-awturi jitkellmu mal-istudenti u jħeġġuhom jaqraw aktar. Fl-2003, Lynne Reid Banks kienet l-ewwel awtriċi li Merlin Library ġab Malta, u wara din kien hemm ħafna oħrajn.

Merlin Publishers twaqqfet fl-1964, u minn dakinhar kbirna u sirna l-aktar pubblikatur innovattiv u eċitanti f’Malta. Il-Merlin kburin bil-lista ta’ kotba ppubblikati minna, mogħnija minn awturi ewlenin u oħrajn li aħna stess qed inrawmu fit-triq tal-pubblikazzjoni bis-saħħa ta’ stili u espressjonijiet innovattivi. Bħala rebbieħa tal-Premju għall-Aħjar Produzzjoni ta’ Ktieb bl-Isbaħ Dehra għal diversi drabi, Merlin Publishers jinsab fuq quddiem nett għall-kwalità tal-produzzjoni, id-disinn, id-dehra finali tal-ktieb, u l-marketing. Il-kotba tal-Merlin dehru fil-fieri tal-kotba fi Frankfurt, Londra u Bolonja.

Pandora Bargain Books toffri varjetà kbira ta’ kotba bl-Ingliż u bil-Malti bi prezzijiet imnaqqsa kemm għall-adulti, kif ukoll għat-tfal. Barra minn hekk, taħt l-isem Pandora Publications, jiġu ppubblikati kotba bil-Malti bi prezz li huwa aċċessibbli għal kull familja f’Malta.

SKS hija dar tal-pubblikazzjoni bbażata f’Malta li tispeċjalizza prinċipalment fil-ġeneri tal-istorja, il-letteratura, it-teorija politika, il-kultura, u l-bijografija. SKS tirsisti biex tinforma u teduka lill-pubbliku ġenerali billi tippubblika kotba ta’ kwalità għolja bbażati fuq fehim liberali tal-ħajja, tal-istorja u tal-letteratura. Tgħin kittieba u riċerkaturi ta’ konvinzjoni simili jippubblikaw ix-xogħlijiet tagħhom, u biex jikkontribwixxu lejn l-arrikkiment soċjali, kulturali, intellettwali u nazzjonali.

L-Ambaxxata Franċiża f’Malta, l-Alliance Française u l-Lireka (ħanut tal-kotba Franċiż online b’pustaġġ b’xejn madwar id-dinja) se joffru firxa wiesgħa ta’ kotba ġodda jew użati bil-Franċiż bi prezzijiet imraħħsa.

Is-Soċjetà Maltija għal Ċivilizzazzjoni Kristjana Pro Malta Kristjana soċjetà twaqqfet fl-2018, ispirata mix-xogħlijiet ta’ Prof. Plinio Correa de Oliveira. L-għan prinċipali tagħha hu li tiddefendi l-ħajja u ċ-Ċivilizzazzjoni Kristjana, speċjalment il-valuri tat-Tradizzjoni, il-Familja u l-Proprjetà. Fost l-attivitajiet tagħha nsibu l-pubblikazzjoni ta’ xogħlijiet ispirati mill-fidi Kattolika u d-duttrina soċjali tal-Knisja, kif ukoll il-messaġġ ta’ Fatima. Is-soċjetà hi ispirata minn soċjetajiet simili fl-Ewropa u madwar id-dinja li bħalha jiddefendu l-valuri bażiċi Kattoliċi.

L-Università ta’ Malta se terġa’ tieħu sehem fil-Festival Nazzjonali tal-Ktieb, irrappreżentata minn THINK Magazine, Malta University Press, u Malta University Distributors. Il-missjoni kollettiva tagħna hija li nesebixxu l-għarfien u l-innovazzjoni tal-akkademiċi u l-istudenti tal-Università. Ir-rivista tar-riċerka uffiċċjali tagħna, THINK, qed tippromwovi dan l-għan billi taqsam riċerka kurrenti mill-Università fil-pubblikazzjonijiet tagħha. L-MUP, il-pubblikatur akkademiku tal-Università, tipproduċi u tiddistribwixxi pubblikazzjonijiet akkademiċi li jiġbru fi ħdanhom l-essenza tal-esplorazzjoni, il-kreattività u l-arrikkiment kulturali fil-komunità dinjija tal-letteratura. Il-Malta University Distributors tipproduċi xogħol akkademiku u rivisti tar-riċerka, inklużi textbooks skont is-sillabi tal-Università u tal-matrikulazzjoni.

Wirt iż-Żejtun hija organizzazzjoni lokali mhux governattiva (NGO) li taħdem fis-settur tal-wirt. Twaqqfet fit-3 t’Ottubru tal-2010 u ppubblikat sbatax-il ktieb. Fost dawn il-pubblikazzjonijiet insibu sitta li jiġbru l-ġabra ta’ studji ppreżentati f’konferenzi biennali organizzati bejn l-2012 u l-2025, filwaqt li sitta oħra jkopru s-serje ‘Għamlulna Ġieħ’, li tiġbor profili ta’ personalitajiet miż-Żejtun li ħallew marka fuq l-istorja u l-kultura tal-villaġġ. Iż-Żejtun Citta’ Beland: Our Heritage – Our Place – Our Life hija l-pubblikazzjoni ewlenija tagħha.

Horizons hija waħda mid-djar tal-pubblikazzjoni ewlenin f’Malta, rebbieħa tal-Premju Nazzjonali tal-Ktieb f’kategoriji differenti matul is-snin. Tippubblika l-aktar rumanzi, novelli, poeżija, Melitensia u letteratura għat-tfal. Temmen li permezz tal-ktieb qed tgħin biex toħloq spazju fejn il-ħsieb independenti, l-espressjoni libera u l-kreattività jiġu kkultivati. Barra minn hekk, Horizons għandha responsabbiltà soċjali korporattiva biex testendi l-irwol tagħha lil hinn mill-kotba li tippubblika. Apparti li tibni relazzjonijiet mal-awturi tagħha, Horizons iżżomm ruħha viċin tal-qarrejja u s-suq, kif ukoll tinforma ruħha dwar id-diffikultajiet tiegħu.