Il-Librerija tal-Università ta’ Malta tippreżenta żewġ taħditiet dwar il-kollezzjonijiet uniċi tagħha: ‘L-Arkivji tal-Librerija u l-Kotba Rari’ ma’ Matthew Cuschieri u ‘Minn Qoxra sa Qoxra: Il-Programm tal-Festa bħala Sors Għani ta’ Melitensia’ ma’ Katja Zahra Camilleri.
Cuschieri se jitkellem dwar ix-xogħol involut fil-kisba u l-kura tal-Kollezzjoni tal-Arkivji u l-Kotba Rari tal-Librerija tal-Università, u se jmiss il-punti ewlenin li jixħtu dawl fuq in-natura unika ta’ dil-kollezzjoni. Zahra Camilleri se tkellimna dwar il-bidu tal-Kollezzjoni Programmi tal-Festa, li tinsab fil-Librerija tal-Kulleġġ Ġan Franġisk Abela. Naraw is-sinjifikanza u l-potenzjal li l-kontenut ta’ dawn il-pubblikazzjonijiet għandu, kemm għall-akkademiċi iżda anki għall-pubbliku ġenerali, ngħidu aħna l-artikli, ir-riklami u l-programmi tal-festa.
