Ħarsa ħafifa

L-Iskema tas-Sussidju għall-Kotba Stampati tnediet fl-1 t’April tal-2026 mill-Kunsill Nazzjonali tal-Ktieb (KNK), u l-għan tagħha hu li ttaffi mill-ispejjeż tal-pubblikazzjoni f’dak li għandu x’jaqsam ma’ stampar ta’ kotba ppubblikati Malta b’ISBN maħruġ mill-KNK. It-tnedija ta’ din l-iskema hija parti mill-Viżjoni Strateġika tal-KNK fuq Ħames Snin (2025-2030).

Il-fond annwali għall-2026 hu ta’ €50,000, u l-fondi jitqassmu abbażi ta’ min japplika l-ewwel jinqeda l-ewwel. Il-kotba eliġibbli għas-sussidju fuq il-prezz tal-karta huma dawk li ġew ippubblikati mill-1 ta’ Jannar sal-15 ta’ Diċembru tas-sena 2026.

Is-sussidju jkopri sa 40% tal-ispiża totali, sa massimu ta’ €2,000 għal kull irċevuta u/jew prova ta’ ħlas.

Qis li qabel tapplika tkun qrajt sewwa t-termini u l-kundizzjonijiet. Id-dokument tat-termini u l-kundizzjonijiet jista’ jitniżżel minn hawn taħt.

Konformità mar-Regolament 2023/2831 tal-KE dwar l-Għajnuna Statali

Din l-iskema konformi mar-Regolament 2023/2831 tal-Kummissjoni Ewropea dwar l-Għajnuna Statali, u għalhekk trid tissottometti l-formola tad-Dikjarazzjoni tal-Għajnuna Statali (De Minimis) fl-applikazzjoni tiegħek.

Il-formola tista’ tniżżilha minn hawn taħt. Wara li timlieha, tkun trid ittellagħha fl-applikazzjoni tiegħek online.

Kif tapplika

Tista’ tapplika billi tagħfas il-buttuna ‘Applika’ fuq il-lemin.