Ħalli impatt barra minn Malta! L-aġent letterarju Simon Trewin b’sessjoni Zoom dwar networking li jaħdem għalik

Il-Kunsill Nazzjonali tal-Ktieb se jtella’ sessjoni esklussiva oħra fuq Zoom mal-aġent letterarju internazzjonali Simon Trewin, miftuħa għall-membri u l-professjonisti kollha tal-komunità Maltija tal-pubblikazzjoni.

Din hija t-tielet sessjoni f’sensiela ta’ attivitajiet li għandhom iwassluna għal attività lajv waqt il-Festival Nazzjonali tal-Ktieb f’Novembru. ‘The Networking Toolkit’ se sseħħ nhar id-19 ta’ Settembru fl-16:00, u fiha Trewin se jagħti l-pariri tiegħu msejsa fuq snin twal ta’ esperjenza dwar kif wieħed għandu jġib ruħu f’avvenimenti ta’ networking fl-ambitu letterarju.

Jekk interessat tipparteċipa, inkiteb hawnhekk sa mhux aktar tard mit-18 ta’ Settembru.

Kemm jekk inti awtur, pubblikatur jew professjonist ieħor fil-qasam tal-letteratura, Trewin se jieħdok tul tappi differenti fix-xena tal-pubblikazzjoni internazzjonali – fi stil tipiku tiegħu li jlaqqa’ l-umoriżmu, l-intwizzjoni u l-anedotti – u jelenka għaxar ideat prattiċi li tista’ tieħu miegħek biex tagħmel kuntatti b’saħħithom u ġġib differenza fin-negozju tiegħek.

Mill-ġenn tal-London Book Fair għall-enormità ta’ dik fi Frankfurt, mill-ilwien tal-fiera tal-kotba f’Bologna għall-opportunitajiet li jkunu qed jistennewk online, f’dis-sessjoni għandek iċ-ċans tara kif bħala Malti tkun tista’ tkun inti wkoll parti minn dil-konverżazzjoni globali.

Ma teħtieġ ebda passaport għal dis-sessjoni ħlief moħħ u ktejjeb għan-noti – it-tnejn miftuħin.

Simon Trewin huwa veteran fl-industrija tal-kotba fir-Renju Unit, u l-kittieba fil-portafoll tiegħu – notevolment awturi bħal John Boyne u r-rebbieħ tal-Premju Booker Paul Lynch – ġew tradotti f’aktar minn 60 lingwa differenti. Trewin issa ilu jikkollabora mal-Kunsill Nazzjonali tal-Ktieb għal dawn l-aħħar snin, u jista’ jitqies bħala ambaxxatur letterarju għal Malta.

Dis-sessjoni b’xejn, iżda trid tirreġistra xorta waħda għaliha billi timla dil-formola. Min għandu xi mistoqsijiet għal Trewin, mitlub iniżżilhom fil-formola stess. Simon Trewin jingħaqad magħna in persona waqt il-Festival Nazzjonali tal-Ktieb f’Novembru li ġej, bl-attività ‘Irfina l-Pitch Tiegħek għall-Katalgu tad-Drittijiet ta’ Barra’, li tista’ tirreġistra għaliha b’xejn minn hawnhekk.