Il-KNK b’donazzjoni ta’ kotba għal-librerija tal-Komunità ta’ Santa Marija

Il-Kunsill Nazzjonali tal-Ktieb (KNK) ippreżenta donazzjoni konsiderevoli ta’ kotba lill-Komunita’ Santa Marija (Aġenzija Sedqa), li se jimlew l-ixkafef tal-librerija u jkunu jistgħu jintużaw mir-residenti li qed jattendu programm ta’ rijabilitazzjoni mid-droga.

Il-preżentazzjoni tal-kotba saret mill-Kap Eżekuttiv Mark Camilleri, u l-Manager Anzjan tal-KNK, Matthew Borg, lill-Unit Leader Miguel Buttigieg u l-Operations Manager Ashley Cumbo mis-Sedqa.

Il-lista ta’ kotba tinkludi rebbieħa tal-Premju Nazzjonali tal-Ktieb, tal-Premju Terramaxka, kotba li kienu fil-lista finali ta’ dawn l-istess premji u kotba oħra maħruġa minn pubblikaturi Maltin fl-aħħar sentejn. Fost l-oħrajn, il-kotba jvarjaw minn letteratura fittizja bħal rumanzi, ġabriet ta’ novelli, poeżija u drama, għal letteratura mhux fittizja bħal bijografiji u storjografiji.

Minbarra d-donazzjoni ta’ kotba li ssir kull sena lil Malta Libraries sabiex jitqassmu fl-ixkafef tal-libreriji pubbliċi, donazzjonijiet oħra bħal dawn il-KNK jagħmilhom sabiex il-kotba jkunu aktar aċċessibbli għal setturi speċifiċi tas-soċjetà.

F’linja mat-tema tal-Festival Nazzjonali tal-Ktieb 2025 li sar ix-xahar l-ieħor – Nikteb mill-Ġdid – il-KNK jawgura li l-kotba u l-qari tal-letteratura jkunu ħolqa oħra fi proċess ta’ bidla trasformattiva mhux għar-residenti biss, imma għal kulħadd.