Joħorġu r-riżultati tal-Fond Malti tal-Ktieb 2025

Il-Kunsill Nazzjonali tal-Ktieb bi pjaċir iħabbar li l-bord tal-aġġudikanti tal-Fond Malti tal-Ktieb qabel fuq il-proġetti rebbieħa tal-edizzjoni ta’ dis-sena. B’kollox se jiġu megħjuna 31 proġett, bejn fondi għall-pubblikazzjoni u fondi għat-traduzzjoni.

Apparti ż-żieda monetarja tal-Fond Malti tal-Ktieb, dis-sena kien hemm bidla oħra ewlenija – il-proċess tal-applikazzjoni u l-aġġudikazzjoni mexa kollu online. Barra minn hekk, il-linjigwida ġew emendati u żdiedu t-trasparenza u ċ-ċarezza matul il-perjodu tal-aġġudikazzjoni.

Il-proġetti rebbieħa ntgħażlu skont damma ta’ kriterji stabbiliti, fosthom is-sħuħija tal-applikazzjoni, il-valur kulturali u edukattiv tal-proġett, l-ingaġġ mas-suq tal-pubblikazzjoni u l-udjenza mira, l-attwalizzazzjoni u l-ispejjeż.

L-aġġudikanti tal-Fond Malti tal-Ktieb 2025 kienu Nikki Petroni, Kurstin Gatt, Francine Farrugia u Daniel Xerri, li aġġudikaw is-sottomissjonijiet b’mod indipendenti.

L-aġġudikanti esprimew ottimiżmu dwar il-kwalità tas-sottomissjonijiet f’kull fergħa tal-Fond, u ddeskrivew is-sitwazzjoni bħala waħda “promettenti u b’enerġija kreattiva”. Dan juri li hemm domanda b’saħħitha għall-għajnuna fil-produzzjonijiet letterarji u kulturali.

“Bosta proġetti wrew ħsieb fil-mod kif ġie trattat is-suġġett tal-proġett u responsabbiltà lejn l-arrikkiment tal-fehim tal-pubbliku bis-saħħa ta’ metodi kreattivi jew skolastiċi”, irrimarkaw l-aġġudikanti, filwaqt li nnutaw li bosta proġetti sottomessi fil-qasam tar-riċerka jew tal-letteratura mhux fittizja jesploraw partijiet mill-istorja Maltija li ngħataw il-ġenb tul iż-żmien. Semmew ukoll li dawk il-proġetti tal-finzjoni ddistingwew ruħhom fl-esperimentazzjoni bil-ġeneru jew il-medium.

“Innovazzjonijiet bħal dawn huma sinjal ta’ kunfidenza akbar sabiex nimxu lil hinn minn formati ta’ pubblikazzjoni tradizzjonali”, sostnew l-aġġudikanti. Madankollu, ġew innutati wkoll xi nuqqasijiet. Fost l-oħrajn, l-aġġudikanti kkummentaw dwar applikazzjonijiet b’dokumenti neqsin u baġitjar vag li allura jqajmu d-dubji dwar kemm il-proġett jista’ jsir. Kien hemm nuqqasijiet anki fil-pjan tal-marketing, u l-aġġudikanti qalu li dan iġegħelhom jitħassbu ftit meta wieħed iqis li qed ngħixu f’ambjent fejn inqas nies qed taqra u li, allura, dan jeħtieġ enfasi akbar fuq kif il-ktieb se jkun promoss biex jattira lill-qarrejja.

Sa meta għalqu l-applikazzjonijiet fl-20 ta’ Mejju, il-Fond Malti tal-Ktieb 2025 kien irċieva 72 applikazzjoni mifruxin fil-fergħat varji tiegħu. L-allokazzjoni finanzjarja dis-sena kienet ta’ €135,000, maqsuma kif ġej:

1. €55,000 f’Għotjiet għall-Pubblikazzjoni ta’ Kotba Ġodda;
2. €10,000 f’Għotjiet għall-Pubblikazzjoni ta’ Kotba Edizzjonijiet Ġodda ta’ Kotba mhux fl-Istampa;
3. €45,000 f’Għotjiet għat-Traduzzjoni u l-Esportazzjoni Kategorija 1: Traduzzjoni u Esportazzjoni ta’ Kotba minn Awturi Maltin;
4. €5,000 f’Għotjiet għat-Traduzzjoni u l-Esportazzjoni Kategorija 2: Traduzzjoni ta’ Silta minn Ktieb bħala Pitch;
5. €20,000 f’Għotjiet għat-Traduzzjoni lejn il-Malti.

L-applikanti li ma rnexxilhomx jieħdu l-fondi f’din l-edizzjoni huma mħeġġa jerġgħu japplikaw fis-sejħa li jmiss kemm bil-proġett li applikaw għalih jew b’xi proġett ieħor.

Kull applikant se jirċievi rapport dwar l-applikazzjoni tiegħu, magħmul mill-marki mogħtija u minn kumment ġenerali.

Il-KNK se jikkuntattja lill-applikanti rebbieħa fil-jiem li ġejjin sabiex jiffirmaw il-kuntratt tal-benefiċjarju, li jagħtihom sentejn (24 xahar) mill-firma tiegħu sabiex ilestu l-proġett.

Il-proġetti kollha li ħadu l-fondi, skont il-fergħa, tista’ ssibhom hawn taħt.

Pubblikazzjoni ta’ Kotba Ġodda

Pubblikazzjoni ta’ Edizzjonijiet Ġodda ta’ Kotba mhux fl-Istampa

Traduzzjoni u l-Esportazzjoni Kategorija 1: Traduzzjoni u Esportazzjoni ta’ Kotba minn Awturi Maltin

Traduzzjoni u l-Esportazzjoni Kategorija 2: Traduzzjoni ta’ Silta minn Ktieb bħala Pitch

Traduzzjoni lejn il-Malti