L-editriċi rinomata mill-Istati Uniti Ann VanderMeer b’workshop waqt il-Festival Nazzjonali tal-Ktieb ‘25

L-editriċi, antoloġista u pubblikatriċi Amerikana rinomata Ann VanderMeer hija waħda mill-mistiedna speċjali tal-Festival Nazzjonali tal-Ktieb 2025, li dis-sena se jsir bejn il-5 u d-9 ta’ Novembru fiċ-Ċentru għall-Fieri u l-Konvenzjonijiet (MFCC), Ta’ Qali.

Il-parteċipazzjoni tagħha fl-akbar avveniment f’Malta li għandu x’jaqsam mal-kotba hija turija tal-importanza tal-Festival bħala l-post fejn l-awturi Maltin isinnu u jtejbu s-sengħa tagħhom tal-kitba. Il-bidla għall-aħjar fl-istil u l-ħila timxi paripassu mat-tema magħżula għal din l-edizzjoni tal-Festival – ‘Nikteb mill-Ġdid’.

Ann VanderMeer taħdem bħala editriċi ma’ Reactormag.com, u xogħolha hu li tgħarrex għal talent ġdid. Għax-xogħol li wettqet bħala t-tieni mara li qatt ħadmet bħala editriċi mal-fuljett Weird Tales, VanderMeer kienet onorata bil-Premju Hugo. Dal-fuljett ippubblika għall-ewwel darba ismijiet kbar fil-letteratura, fosthom HP Lovecraft u Robert E. Howard. Taħt l-editorija ta’ VanderMeer bejn l-2007 u l-2011, il-fuljett immodernizza ruħu u wessa’ l-iskop tiegħu.

Ann ikkoeditjat numru ta’ antoloġiji letterarji ma’ żewġha Jeff – li wkoll huwa mistieden ewlieni tal-Festival. Fosthom The Weird: A Compendium of Strange and Dark Stories, li bih il-koppja VanderMeer rebħet il-World Fantasy Award, il-Locus Award, u l-British Fantasy Award. Kotba oħra huma The Big Book of Science Fiction, The Big Book of Classic Fantasy, u The Big Book of Modern Fantasy.

VanderMeer mexxiet diversi workshops tal-kitba, fosthom waqt il-Konferenza tal-Kittieba fl-Università ta’ Yale, il-Clarion, l-Odyssey, u x-Shared Worlds (kamp ta’ kitba għaż-żgħażagħ), kif ukoll ikkonduċiet seminars dwar il-kreattività immirati lil udjenzi differenti, ngħidu aħna lil-librara tal-istat ta’ Arizona jew fi Blizzard Entertainment.

Waqt il-Festival Nazzjonali tal-Ktieb, VanderMeer se tkun qed tmexxi l-workshop ‘Kif Taħdem ma’ Editur Professjonali’, li fih bis-saħħa ta’ eżerċizzji u notamenti qosra se tkun qed tgħin lill-parteċipanti jifhmu aħjar xi jkun l-editjar u r-reviżjoni ta’ xogħol letterarju.

“Ixxurtjati immens li se jkollna editriċi bħal Ann VanderMeer magħna fil-Festival – anki għax se tiġi u taqsam magħna l-ħiliet tas-sengħa tagħha”, irrimarka l-Kap Eżekuttiv tal-Kunsill Nazzjonali tal-Ktieb, Mark Camilleri.

“Kull min hu involut fid-dinja tal-pubblikazzjoni jaf li fi kwalunkwe stadju fl-iżvilupp ta’ manuskritt, l-editjar mitqlu deheb li jassigura li l-ktieb jasal fis-suq fl-aħjar forma tiegħu – fil-forma li fih tidher l-aktar il-kapaċità tal-kittieb. Inħeġġeġ lill-kittieba kollha – misjura jew le – sabiex jieħdu din l-opportunità biex itejbu l-ħiliet tagħhom”, żied Camilleri.

L-attendenza għall-workshop ‘Kif Taħdem ma’ Editur Professjonali’ waqt il-Festival Nazzjonali tal-Ktieb b’xejn, iżda trid tirreġistra għax jattendi min japplika l-ewwel minħabba l-postijiet limitati. Tista’ tirreġistra hawnhekk. Jekk jogħġbok innota li qabel trid toħloq kont ma’ Submittable biex tkun tista’ tirreġistra.