Sejħa Miftuħa għal Proposti ta’ Installazzjoni: Ix-Xogħol Artistiku Ċentrali tal-Esebizzjoni From Illustration to Book waqt il-Festival Nazzjonali tal-Ktieb 2025 

Il-Kunsill Nazzjonali tal-Ktieb (KNK), f’kollaborazzjoni mal-Kunsill Malti għall-Arti (KMA) u l-istamperija Gutenberg Press, qed iniedi sejħa għal artist biex jipproduċi installazzjoni għall-esebizzjoni From Illustration to Book, li se tkun parti mill-edizzjoni ta’ dis-sena tal-Festival Nazzjonali tal-Ktieb. Il-Festival u l-esebizzjoni se jittellgħu bejn il-5 u d-9 ta’ Novembru fiċ-Ċentru għall-Fieri u l-Konvenzjonijiet (MFCC), Ta’ Qali. Din se tkun ir-raba’ edizzjoni ta’ esebizzjoni dedikata għad-disinji u l-illustrazzjonijiet tal-kotba, u hija parti integrali mill-attivitajiet marbuta mal-Festival Nazzjonali tal-Ktieb.

L-installazzjoni se tkun ix-xogħol artistiku ċentrali tal-esebizzjoni u għandha timxi id f’id mat-tema tal-Festival Nazzjonali tal-Ktieb 2025: nikteb mill-ġdid. Kull sforz letterarju huwa proċess metamorfiku, kemm jekk jinvolvi t-trasformazzjoni tal-ħajja fi kliem fuq il-paġna kif ukoll jekk xogħol letterarju jiġi tradott għal-lingwa artistika oħra, bħal ngħidu aħna l-arti viżiva jew tal-idejn. Mogħni bil-poter kreattiv, l-artist huwa kapaċi jagħġen kulma jista’ jilħaq b’idejh f’xi forma ġdida biex jirrifletti d-dinja ta’ madwarna li qiegħda kulma tmur tinbidel, u anki biex joħloq mod ġdid tal-għajxien.

Din l-inizjattiva tifforma parti mill-kollaborazzjoni strateġika bejn il-KNK u l-KMA, li għandha l-għan li tesponi u tippromwovi l-innovazzjoni fi ħdan l-industrija tal-pubblikazzjoni lokali biex tħeġġeġ, tgħin u tikkultiva l-iżvilupp ta’ ideat ġodda. B’dan il-mod, din il-kollaborazzjoni toħloq ambjent li jistimola l-ħsieb kreattiv u l-esplorazzjoni ta’ mogħdijiet ġodda fi ħdan l-industrija tal-pubblikazzjoni lokali. Dan jinkludi l-aspetti kollha tal-professjonijiet kreattivi, kif ukoll it-tweżin ta’ proġetti li jaqdfu kontra l-limiti u li jimmirraw għall-eċċellenza. F’pari passu mat-tema nikteb mill-ġdid tal-Festival ta’ dis-sena, dan jinvolvi l-issapportjar tal-professjonisti kreattivi biex namplifikaw il-vuċijiet u l-espressjoni tagħhom hekk kif dawn l-artisti jnaqqxu d-dinja li naqsmu ma’ xulxin u l-istejjer tagħna permezz ta’ forom t’arti differenti, biex b’hekk jibdlu l-mod kif naraw u nirrelataw magħhom.

X’Qed Noffru

Il-KNK u l-KMA qed ifittxu artist kreattiv u innovattiv biex jipproduċi installazzjoni ispirata mill-kunċett ċentrali tal-Festival, nikteb mill-ġdid. Din se tkun magħmula minn materjal tal-istampar riċiklat, ġentilment provdut minn Gutenberg Press.

L-ispazju allokat għal din l-installazzjoni huwa ta’ 4m x 3m.

Dawn huma l-materjali disponibbli għall-artist:

• • Folji pprintjati ta’ paġni u kartun;
  • Balel ta’ karti mqattgħa;
  • Kartun griż;
  • Kaxxi tal-kartun;
  • Paġni u blokok ta’ kotba varji;
  • Kopertini tal-kotba;
  • Pjanċi tal-aluminju.

Il-materjali jintgħażlu mill-artist waqt żjara fl-istamperija tal-Gutenberg Press, u jitwasslu f’post speċifikat mill-artist mingħajr ħlas. F’każ li jkollu bżonn aktar materjal, l-artist għandu jkun responsabbli biex jirranġa t-trasport hu.

L-artist jingħata l-ħlas ta’ €3,000 (VAT inkluż) biex ikopri l-produzzjoni u l-installazzjoni kif ukoll xi spejjeż oħra.

Dan ix-xogħol artistiku għandu jiġi installat ftit jiem qabel il-ftuħ tal-Festival f’data u ħin indikati mill-KNK u żarmat mhux aktar tard mit-Tnejn, l-10 ta’ Novembru sa 12pm (nofsinhar).

Kif Tapplika

Qed nistednuk tissottometti proposta b’deskrizzjoni u xi skeċċijiet biex tiġi kkunsidrata għall-edizzjoni ta’ dis-sena tal-esebizzjoni From Illustration to Book.

Is-sottomissjoni għandha tinkludi:

1. 1. Deskrizzjoni tal-kunċett tal-installazzjoni, li tindika b’mod ċar kif l-installazzjoni proposta timxi mat-tema tal-Festival;
   2. Portafoll bi proġetti relevanti;
   3. CV riċenti;
   4. Skeċċijiet li juru l-idea inizjali għall-installazzjoni.

Jekk jogħġbok, issottometti l-applikazzjoni tiegħek permezz ta’ Submittable, fejn tista’ tehmeż ħoloq tal-Google Drive għall-istampi u l-fajls kbar. Nitolbuk taċċerta li l-ħoloq tal-Goodle Drive kollha jkollhom aċċess mhux ristrett.

Il-Proċess tas-Selezzjoni

Is-sottomissjonijiet se jiġu evalwati minn bord immexxi mill-KNK u l-KMA, li se jikkunsidra t-tliet kriterji t’hawn taħt:

• • Kunċett u tema;
  • Sengħa u teknika;
  • Kreattività u innovazzjoni.

Dati Importanti 

Ftuħ is-sejħa: is-27 ta’ Mejju 2025

Għeluq tas-sottomissjonijiet: is-17 ta’ Ġunju 2025

Tħabbir tar-riżultati: l-24 ta’ Ġunju 2025

Jekk għandek xi mistoqsijiet, ibgħat email lil Jasmine Bajada fuq jasmine-alexa.bajada@gov.mt.