Dik l-Enerġija tal-Quad: Imraħ fil-Varjetà ta’ Pubblikaturi ta’ Kampus Kotba

  1. Kunsill Nazzjonali Tal-Ktieb
  2. Festivals
  3. Il-Festival tal-Ktieb fuq il-Kampus
  4. Dik l-Enerġija tal-Quad: Imraħ fil-Varjetà ta’ Pubblikaturi ta’ Kampus Kotba




Posted on March 6, 2024

Il-11-il edizzjoni tal-Festival tal-Ktieb fuq il-Kampus tinsab magħna, u għal din l-edizzjoni l-Kunsill Nazzjonali tal-Ktieb qed jippreżenta wħud mill-aħjar pubblikaturi Maltin li tul tlitt ijiem se jkunu qed joffru għażla wiesgħa ta’ kotba ġodda, uħud minnhom bi skontijiet speċjali għall-istudenti u l-pubbliku.

Il-pubblikaturi li se jipparteċipaw dis-sena huma l-Klabb Kotba Maltin/Midsea Books, Horizons, Ede Books, Faraxa Publishing, Kite Group, Kotba Calleja, SKS Publishers, Malta University Press u Malta University Distributors, kif ukoll esebituri oħra bħall-Għaqda tal-Malti – Università u l-Kunsill Malti għall-Arti.

Tipi differenti ta’ pubblikaturi – kotba li se jmissu lil kulħadd

Fattur interessanti li se jikkaratterizza din l-edizzjoni huwa t-tipi differenti ta’ pubblikaturi li se jipparteċipaw, b’kotba li jvarjaw kemm fl-udjenza li jimmiraw lejha, fil-ġeneri letterarji jew akkademiċi li jittrattaw, u anki fil-produzzjoni nnifisha tal-ktieb bħala prodott kummerċjali. Kull pubblikatur se joffri perspettiva partikulari mis-suq lokali, u l-inħawi universitarji se jseddqu l-iskambju tal-ideat.

Nistennew il-kwalità għolja ta’ kotba li issa drajna minn pubblikaturi stabbiliti u li ilhom magħna żmien, ngħidu aħna Klabb Kotba Maltin, Horizons, Kite Group jew SKS – pubblikaturi li għal għexieren ta’ snin ipproduċew il-kotba li kbirna bihom u li eventwalment studjajna bihom.

Imbagħad hemm pubblikaturi li għalkemm ilhom inqas snin fis-suq, diġà ħarġu minn taħt idejhom kotba li baqgħu sejrin biex rebħu l-Premju Nazzjonali tal-Ktieb, li huwa l-ogħla premju letterarju f’Malta li awtur u pubblikatur jistgħu jaspiraw għalih. Qed nitkellmu dwar pubblikaturi bħal Ede Books li tawna Marta Marta, jew Kotba Calleja li jipproduċu kotba bl-idejn bi stil tagħhom li jintgħaraf mill-ewwel, u li fost l-oħrajn fil-ftit snin li ilhom attivi ppubblikaw il-ġabra ta’ poeżiji tal-ewwel Poeta Lawreat ta’ Malta, Maria Grech Ganado. Għal min tinteressah il-letteratura dinjija tradotta għall-Malti, ma jistax ma jkunx kuntent bil-parteċipazzjoni ta’ Faraxa Publishing, li stabbilixxew katalgu ta’ kotba seminali li sabu ruħhom fl-espressjoni lokali.

Għall-ewwel darba, se jkollna ż-żewġ pubblikaturi ewlenin ta’ materjal li joħroġ mill-Università ta’ Malta, bil-parteċipazzjoni tal-Malta University Press u tal-Malta University Distributors.

Il-Festival tal-Ktieb fuq il-Kampus se jseħħ bejn l-Erbgħa 20 u l-Ġimgħa 22 ta’ Marzu mid-9am ’il quddiem fil-Kwadranglu tal-Università ta’ Malta. Id-dħul huwa b’xejn kemm biex iżżur lill-pubblikaturi u anki biex tattendi l-programm tal-attivitajiet.

Share Article