Il-Festival Nazzjonali tal-Ktieb 2025

Il-Kunsill Nazzjonali tal-Ktieb iħabbar bi pjaċir l-edizzjoni tal-Festival Nazzjonali tal-Ktieb għal dis-sena, li se ssir bejn il-5 u d-9 ta’ Novembru l-MFCC, Ta’ Qali. L-edizzjoni tal-2025 qiegħda tħaddan viżjoni distinta, b’din it-tema li tross fiha l-ispirtu tal-bidla u t-trasformazzjoni – nikteb mill-ġdid. Il-logo u t-tema jirriflettu din id-direzzjoni artistika, li jwittu t-triq għal kapitlu ġdid għall-akbar ċelebrazzjoni tal-kotba u l-qari fil-Gżejjer Maltin.

Fil-qalba tagħha, kitba mill-ġdid tirrappreżenta l-qawwa trasformativa tal-letteratura — kemm jekk il-ħajja tinbidel fi kliem u kemm jekk xogħol letterarju jieħu l-ħajja f’xi forma artistika oħra, u kull ġeneru jiftaħ bibien għal skoperti ġodda. Kull ktieb jesprimi b’xi mod jew ieħor bidla fil-qagħda jew fil-ħsieb – sija jekk iżommok miegħu minħabba l-pass mgħaġġel ta’ narrattiva tensa, sija jekk jitħarrek bil-qies fid-deskrizzjoni ta’ mument mill-istorja, sija jekk jieħdok fi vjaġġ f’ġeneri differenti li jqanqlu fik espressjonijiet differenti – dal-vjaġġ jgħaddik minn paġna għal oħra sakemm tasal fl-aħħar waħda. Il-Festival ta’ din is-sena jiċċelebra din il-vjaġġ, u jistieden qarrejja ta’ kull età biex jesploraw il-qawwa tal-istejjer li joffrulna bidu ieħor, u jsaħħru mill-ġdid.

L-attendenza għall-Festival u għall-avvenimenti l-oħra kollha hija bla ħlas.

€20 VAWĊER GĦALL-ISTUDENTI KOLLHA!

5-9 ta' Novembru, 2025

MFCC, Ta' Qali

–
Kull tifel u tifla tal-primarja u s-sekondarja li jattendu l-Festival Nazzjonali tal-Ktieb 2025 huma eliġibbli għal vawċer ta’ €20 li jista’ jissarraf mingħand l-esebituri kollha tal-Festival fil-ħinijiet tal-ftuħ.

Assigura avventura unika għal uliedek jew l-istudenti tiegħek – irreġistrahom b’xejn għall-vawċer tagħhom!

Kif nirreġistra?

L-edukaturi li ġejjin bil-klassi tagħhom iridu jirreġistraw minn qabel. Diġà bdejna niltaqgħu mal-iskejjel sabiex inħeġġukom tibdew tibbukkjaw online minn Settembru li ġej meta jiftħu l-applikazzjonijiet. Dawk l-istudenti li jiġu bbukkjati bħala parti minn klassi jingħataw il-vawċer tagħhom stampat meta jaslu l-Festival, u allura dawn m’għandhomx għalfejn jirreġistraw għall-vawċer b’mod indipendenti.
L-istudenti kollha l-oħra li se jżuru l-Festival mal-familja jew ma’ min jieħu ħsiebhom (mhux mal-klassi) iridu jirreġistraw b’mod indipendenti u għalhekk mistiedna jirreġistraw online minn dan is-sit. Dawn ir-reġistrazzjonijiet jiftħu s-Sibt 11 ta’ Ottubru 2025.

ATTIVITAJIET

Programm

Il-Festival Nazzjonali tal-Ktieb ta’ Malta huwa ċelebrazzjoni ta’ stejjer, ideat, u kreattività. Il-programm online tagħna jiġbor flimkien għażla eċċitanti ta’ awturi, pubblikaturi, u artisti, b’avvenimenti għal qarrejja ta’ kull età. Minn diskussjonijiet animati u tnedijiet ta’ kotba ġodda għal attivitajiet immaġinattivi għat-tfal, hemm xi ħaġa għal gosti ta' kulħadd.

MISTIEDNA SPEĊJALI

Samantha Harvey

Awtriċi

L-awtriċi Ingliża Samantha Harvey hija r-rebbieħa tal-Premju Booker 2024 bir-rumanz Orbital. L-ewwel rumanz tagħha, The Wilderness (2009), għadda mal-finalisti għall-Premju Orange għall-Finzjoni, mal-lista t-twila għall-Man Booker Prize, u rebaħ il-Betty Trask Prize, filwaqt li kien akklamat għall-mod dirett ta’ kif ittratta t-telfien tal-memorja u l-identità. All Is Song (2012) tfaħħar għall-approfondiment filosofiku u l-proża eleganti tiegħu, filwaqt li r-rumanz Dear Thief (2014) kien mal-lista t-twila tal-Baileys Women’s Prize għall-Finzjoni, u tqies minn James Woods tan-New Yorker bħala “vjaġġ stramb imma hieni li qatt qabel ma esperjenzajt bħalu”. Fl-2018 The Western Wind kien finalist fil-Premju Walter Scott u mal-lista t-twila tal-International Dublin Literary Award, u l-kritiċi nnutaw l-ambjent medjevali kuraġġuż li ħolqot l-awtriċi kif ukoll l-istruttura narrattiva oriġinali tal-ktieb. Ix-xogħol mhux fittizju ta’ Harvey, The Shapeless Unease (2020), li huwa ġabra ta’ tifkiriet dwar l-insomnja, ġie deskritt mill-awtur Nathan Filer bħala “meditazzjoni profonda dwar il-lingwa, it-telfien, u ż-żmien, u dwar kif nibnu lilna nfusna bl-istejjer”. Harvey tgħallem fil-kors tal-Maġisteru dwar il-Kitba Kreattiva fl-Università ta’ Bath Spa.

Jeff VanDerMeer

Awtur

Jeff VanderMeer huwa l-awtur ta’ Hummingbird Salamander; ir-rumanzi Borne (Borne, The Strange Bird, u Dead Astronauts); u s-serje Southern Reach (Annihilation, Authority, Acceptance u Absolution) – l-ewwel volum f’din is-serje rebaħ il-Premju Nebula u l-Premju Shirley Jackson u ġie adattat f’film minn Paramount. Il-kitbiet ambjentali mhux fittizji ta’ VanderMeer dehru f’Time, The Nation, Current Affairs, u Esquire, fost oħrajn. VanderMeer huwa wkoll il-koeditur (flimkien ma’ martu Ann VanderMeer) ta’ għadd ta’ antoloġiji innovattivi bħal Best American Fantasy 1 and 2, Steampunk 1 and 2, New Weird, The Weird, The Thackery T. Lambshead Cabinet of Curiosities, The Time Traveler’s Almanac, The Big Book of Science Fiction, The Big Book of Classic Fantasy, u The Big Book of Modern Fantasy.

Ann VanDerMeer

Pubblikatur u editur

Ann VanderMeer hija editriċi u antoloġista rebbieħa ta’ diversi premji. Bħalissa qed isservi ta’ editriċi tal-akkwisti għal Reactormag.com. Rebħet il-Premju Hugo meta kienet tmexxi l-editorija ta’ Weird Tales. Fost diversi nominazzjonijiet, rebħet il-Premju Dinji tal-Fantasija, il-Premju Locus u l-Premju Ingliż tal-Fantasija għal The Weird: A Compendium of Strange and Dark Stories. Għallmet numru sabiħ ta’ workshops tal-kitba, fosthom il-Yale University Writers Conference, Clarion, Odyssey u Shared Worlds (kamp tal-kitba għaż-żgħażagħ). Tat anki seminars dwar il-kreattività lil udjenzi varji, mil-librari tal-istat tal-Arizona sa Blizzard Entertainment.

ATTIVITAJIET GĦALL-FAMILJI U T-TFAL

M'hawnx ħarġa aħjar għall-familja milli mawra sal-Festival Nazzjonali tal-Ktieb! U dis-sena mhux se tkun inqas mill-oħrajn - bejn l-Erbgħa 5 u l-Ħadd 9 ta' Novembru qed inħejju għadd ta' xows immirati għall-familja kollha.

XOWS TEATRALI TERRAMAXKA

Esperjenza l-letteratura tat-tfal permezz tat-teatru fil-Festival Nazzjonali tal-Ktieb 🎭📚
Erba’ produzzjonijiet teatrali, ikkurati minn Simone Spiteri, jagħtu l-ħajja lil kotba rebbieħa tal-Premju Terramaxka fi spazju teatrali ġewwa l-MFCC, Ta’ Qali.
Ara l-iskeda sħiħa tal-ispettakli.
Id-dħul huwa b'xejn iżda l-postijiet huma limitati - ibbukkja l-post tiegħek minn hawn ✨

PAKKETTI TA' RIŻORSI GĦALL-FESTIVAL

Ġdid għall-2025! Il-Festival Nazzjonali tal-Ktieb qed iniedi Pakkett ta’ Riżorsi għall-istudenti tal-primarja u tas-sekondarja, mibnija madwar it-tema “Kif nagħżel ktieb?”. Dawn il-pakketti interattivi jinkludu attivitajiet biex iqanqlu l-kurżità u l-kunfidenza fil-qari, għodod biex jesploraw ġeneri ta' kitba, u materjali għall-ġenituri u l-għalliema biex jestendu t-tagħlim fl-iskola jew fid-dar.

👉 Niżżel il-Pakkett ta’ Riżorsi