Dinjiet letterarji differenti jpoġġu ħdejn xulxin waqt il-Festival Nazzjonali tal-Ktieb 2024

  1. Kunsill Nazzjonali Tal-Ktieb
  2. Festivals
  3. Dinjiet letterarji differenti jpoġġu ħdejn xulxin waqt il-Festival Nazzjonali tal-Ktieb 2024




Posted on August 19, 2024

Il-programm tal-Festival Nazzjonali tal-Ktieb 2024 se jkun imżiegħed b’attivitajiet li żgur se jiġbdu l-attenzjoni tal-ħabbieba kollha tal-kotba, kemm jekk żgħar u kemm jekk kbar. Il-Kunsill Nazzjonali tal-Ktieb (KNK) jinsab sodisfatt bil-mod kif qed jiżvolġu l-preparamenti għall-programm, li se jkun jinkludi firxa wiesgħa ta’ attivitajiet, minn xows teatrali u qari ta’ stejjer għat-tfal sa tnedijiet u ffirmar ta’ kotba mmirati għall-kbar, kollha taħt saqaf wieħed fl-MFCC bejn l-Erbgħa 6 u l-Ħadd 10 ta’ Novembru. L-udjenza se tkun qed tesperjenza tassew xi rridu ngħidu bit-tema #dinjietjirrimaw.

“Il-qarrejja kollha jafu li ktieb għandu saffi differenti, u kburi ngħid li l-Festival Nazzjonali tal-Ktieb kull sena jiċċelebra din il-karatteristika tal-kelma miktuba, u allura mhux inqas dis-sena b’għadd ta’ attivitajiet li se jattiraw numru sabiħ ta’ nies,” qal il-Kap Eżekuttiv tal-KNK Mark Camilleri.

Il-programm se jkun fih attivitajiet apposta għal tfal fuq l-ispettru tal-awtiżmu. Dawn se jseħħu fil-Kamra Sensorja, li se titmexxa minn Inspire Malta bis-sapport tal-Bank APS, u kull sessjoni ta’ qari se taddatta ruħha għall-età tal-persuni b’mod inklussiv. Min-naħa tagħha, l-Aġenzija għall-Enerġija u l-Ilma se terġa’ tipparteċipa b’attivitajiet għat-tfal dwar l-importanza li ma neħlux l-ilma u l-bijodiversità. L-Aġenzija Nazzjonali tal-Litteriżmu mbagħad se torganizza sessjonijiet ta’ qari għal gruppi ta’ tfal skont l-età – bejn 0 u 12-il sena – li jrawmu fihom l-imħabba u l-gost għall-qari.

Dis-sena fit-teatru se jkollna lil Steve Hili, ballun ta’ enerġija teatrali li se jieħu ħsieb ix-xows għat-tfal, fosthom ‘L-Istorja Splussiva tat-Tifla Stupenda tal-Kotba’ għall-primarja, u ‘Il-Ħatfa l-Kbira tal-Immaġinazzjoni’ għal tfal fis-sekondarja li se jimmaġinaw lilhom infushom qed jisirqu l-immaġinazzjoni lil awtur famuż. Iż-żewġ xows se jkunu bbażati fuq kotba rebbieħa tal-Premju Terramaxka, u se jlaqqgħuna mill-ġdid mal-potenzjal tal-letteratura li tqarreb kemm il-persuni u anki ġeneri differenti lejn xulxin.

Waqt il-Festival se jkun hemm ukoll iċ-ċans li tara kif jinħolqu – u tipparteċipa wkoll – elementi varji tal-proċess tal-kotba jew tal-kreazzjoni letterarja, b’workshops dwar l-illustrazzjonijiet, l-illegar tal-kotba, u dwar kif minn idea tasal għall-prodott finali fuq l-ixkaffa. “Kruċjali li nenfasizzaw ix-xogħol u d-dedikazzjoni li persuna tinvesti fi ktieb. Bis-saħħa ta’ attivitajiet immirati għal etajiet differenti u mmexxija minn mgħallmin fis-settur, il-KNK irid jiċċelebra lil dawn in-nies u fl-istess ħin jistieden lill-pubbliku jara b’għajnejh il-proċess kreattiv tagħhom,” żied Camilleri.

Minbarra t-tnedijiet tal-kotba ma’ kittieba lokali u internazzjonali, il-Festival se jkun fih ukoll attivitajiet għal dawk interessati fl-aspett internazzjonali tal-industrija tal-kotba u għal dawk li jridu jisimgħu x’għandhom xi jgħidu nies irrispettati dwar kif tirfina senegħtek fil-kitba. 

Kif diġà tħabbar, il-mistieden speċjali tal-Festival huwa l-kittieb bestseller mir-Renju Unit, Anthony Horowitz, li se jkun qed imexxi masterclass dwar il-kitba kreattiva mirfud mit-tattika tiegħu fil-ħolqien ta’ kitba li żżommok imweħħel taqraha. Imbagħad hemm l-aġent letterarju Jonathan Lloyd (Curtis Brown) li se jitkellem ma’ Kat Storace (Praspar Press) dwar ir-realtajiet li jiffaċċja bħala aġent letterarju ta’ kittieba mondjali.

“Se nkunu qed inħabbru aktar attivitajiet fil-ġimgħat li ġejjin, u eventwalment il-programm sħiħ qrib id-dati tal-Festival. Nista’ ngħid b’ċertezza li dawk kollha li jħobbu l-kotba se jieħdu gost ħafna xħin jiftħu l-programm quddiemhom… il-programm tal-attivitajiet tal-akbar ċelebrazzjoni tal-kultura tal-kotba f’Malta,” ikkonkluda Camilleri.

Il-programm sħiħ tal-attivitajiet tal-Festival Nazzjonali tal-Ktieb 2024 (6-10 ta’ Novembru) ikun ippubblikat fil-ġimgħat li ġejjin.

Għal aktar aġġornamenti segwi ktieb.org.mt, il-paġna Facebook tal-Kunsill Nazzjonali tal-Ktieb u tal-Festival Nazzjonali tal-Ktieb u l-Instagram tal-KNK.

Share Article