Minn Komuni għal Memorabbli: Il-Ħolqien ta’ Kitba Fittizja li Ma Tistaġnax – Proofreading Malta 🇬🇧

Fuq l-internet qarrej jista’ jagħżel minn fost mijiet ta’ kotba. Imma x’se jġiegħlu jieqaf u jagħżel proprju l-ktieb tiegħek? F’dan is-seminar prattiku għall-kittieba, il-Konsulenta Editorjali Elizabeth Cortis u l-Editriċi Anzjana Diana Grech Pearson minn Bookmark Editors se jiddiskutu sfida li ħafna kittieba lanqas biss jintebħu biha: it-tendenza li l-istejjer jinħassu għalkollox oriġinali minn min jiktibhom, filwaqt li l-qarrejja u l-pubblikaturi b’esperjenza jħossuhom xi ftit jew wisq familjari jew saħansitra ripetittivi. B’eżempji prattiċi ta’ xejriet rikorrenti li naraw fil-manuskritti li jaslu għandna, is-sessjoni se teżamina x’jagħmel narrattiva tinħass friska, memorabbli, u distinta fid-dinja letterarja kompetittiva tal-lum. Punt ewlieni li se jiffoka fuqu s-seminar se jkun dwar kif l-IA tista’ tintuża bħala għodda prattika biex wieħed jifhem aħjar it-tendenzi ta’ ġeneru partikolari u x’jistennew il-qarrejja. Permezz ta’ eżempji u tħeġġiġiet, il-parteċipanti se jesploraw il-possibiltajiet u l-limiti tal-IA, u jitgħallmu kif din l-għodda tista’ tgħinhom jevalwaw xogħolhom b’għajn aktar kritika u jiżviluppaw stejjer fittizji aktar distinti mingħajr ma jitilfu l-vuċi individwali tagħhom bħala awturi.

Post: Is-Sala tal-Qarrejja