Sejħa Miftuħa għas-sottomissjonijiet ta’ illustrazzjonijiet għall-esebizzjoni From Illustration to Book fil-Festival Nazzjonali tal-Ktieb 2025

Il-Kunsill Nazzjonali tal-Ktieb (KNK), flimkien mal-Kunsill Malti għall-Arti (KMA) qed iniedi sejħa għal sottomissjonijiet għall-esebizzjoni tal-Festival Nazzjonali tal-Ktieb 2025, From Illustration to Book. Il-Festival u l-esebizzjoni se jittellgħu bejn il-5 u d-9 ta’ Novembru 2025 fiċ-Ċentru tal-Fieri u l-Konvenzjonijiet (MFCC), Ta’ Qali.

Din se tkun ir-raba’ edizzjoni ta’ esebizzjoni dedikata għad-disinji u l-illustrazzjonijiet tal-kotba, u hija parti integrali mill-attivitajiet marbuta mal-Festival Nazzjonali tal-Ktieb. L-għan ta’ From Illustration to Book huwa li sservi bħala vetrina għax-xogħlijiet tal-illustraturi u d-disinjaturi ewlenin tal-kotba f’Malta, waqt li tfakkar il-pijunieri f’dan il-qasam permezz ta’ diversi sezzjonijiet apposta: ‘Illustration Today’, ‘Artist Spotlight’, ‘Maltese Illustrated Characters’, u żona dedikata għall-Malta Community of Illustrators (MCOI), fejn se jiġu esebiti xi xogħlijiet magħżula mill-edizzjoni ta’ dis-sena tal-Illustration Annual. 

Mis-sena l-oħra ġiet introdotta fergħa ġdida f’din l-esebizzjoni, li ġġib l-isem ta’ ‘From Idea to Illustration’. Din iż-żieda toffri ħarsa minn wara l-kwinti ta’ diversi xogħlijiet esebiti f’‘Illustration Today’ u tiżvela l-istadji bikrija tal-proċess artistiku. Din is-sezzjoni tixgħel bozza fuq l-attitudnijiet u l-istili tal-artisti permezz ta’ ġabra ta’ skeċċijiet, disinji u noti. 

Permezz ta’ din is-sejħa miftuħa, il-KNK u l-KMA qed jilqa’ sottomissjonijiet ta’ illustrazzjonijiet minn artisti kemm lokali kif ukoll internazzjonali biex jiġu esebiti f’‘Illustration Today’ u ‘From Idea to Illustration’.

Din is-sena, l-esebizzjoni se tiftaħ il-bibien tagħha għal artisti minn madwar id-dinja, b’sezzjoni dedikata għall-illustrazzjoni internazzjonali.

Din l-inizjattiva tifforma parti mill-kollaborazzjoni strateġika bejn il-KNK u l-KMA li għandha l-għan li tippromwovi l-innovazzjoni fi ħdan l-industrija tal-pubblikazzjoni lokali biex tħeġġeġ, tgħin u tikkultiva l-iżviluppar ta’ ideat ġodda, u b’dan il-mod toħloq ambjent li jistimola l-ħsieb kreattiv u l-esplorazzjoni ta’ mogħdijiet ġodda fi ħdan l-industrija tal-pubblikazzjoni lokali.

X’Qegħdin Infittxu

Nistednuk biex tressaq illustrazzjonijiet u/jew disinji biex jiġu kkunsidrati għall-esebizzjoni tal-Festival Nazzjonali tal-Ktieb 2025 From Illustration to Book. Jiġu aċċettati dawn li ġejjin:

📚🎨 il-qoxra finali tal-ktieb b’tipografija u illustrazzjoni;

📚🎨 jew l-illustrazzjoni nnifsiha li hija parti mill-qoxra tal-ktieb iżda ppreżentata indipendentament mill-qoxra;  

📚🎨 jew illustrazzjoni mill-paġni ta’ ġewwa tal-ktieb bħala parti mit-tqassim interjuri tal-ktieb;

📚🎨 jew l-illustrazzjoni nnifisha li hija parti mit-tqassim interjuri tal-ktieb imma ppreżentata indipendentament mill-ktieb; 

📚🎨 jew disinn grafiku ta’ qoxra ta’ ktieb ippubblikat jew tal-paġni ta’ ġewwa.

❗️Qed naċċettaw ukoll skeċċijiet jew xogħlijiet fi stat bikri tal-illustrazzjonijiet sottomessi biex jiġu esebiti f’sezzjoni msejħa ‘From Idea to Illustration’.

L-applikant jista’ jressaq dan it-tip ta’ xogħol li diġà ġie ppubblikat jew li se jiġi ppubblikat sal-ġurnata tal-ftuħ tal-Festival Nazzjonali tal-Ktieb (il-5 ta’ Novembru 2025):

1. ‘ippubblikat’ jew ‘awtoppubblikat’; 
2. minn ktieb mitbugħ jew e-book; 
3. illustrazzjoni/disinn grafiku għal ktieb ippubblikat (b’ISBN Malti) minn illustratur/disinjatur b’ċittadinanza Maltija jew lil hinn;
4. jew illustrazzjoni/disinn grafiku minn illustratur Malti għal ktieb ippubblikat barra minn xtutna (b’ISBN barrani).
5. jew illustrazzjoni/disinn grafiku minn illustratur/disinjatur b’ċittadinanza mhux Maltija (b’ISBN barrani).

Kif Tapplika

Jekk jogħġbok ressaq massimu ta’ tliet (3) xogħlijiet artistiċi f’formatt ta’ b’reżoluzzjoni għolja (fajl tat-tip pdf, jpg jew eps) b’dawn is-sottotitoli:

📝 ILLUSTRATUR 

📝 ISEM TAX-XOGĦOL ARTISTIKU 

📝 MEZZ 

📝 DETTALJI TA’ KUNTATT (Instagram or other social media, website) 

📝 TITLU TAL-KTIEB

Jekk jogħġbok ressaq l-applikazzjoni tiegħek permezz ta’ din il-ħolqa, u fiha inkludi: ħolqa tax-xogħol artistiku tiegħek u l-iskeċċijiet, jekk applikabbli, permezz ta’ ħolqa għal Google Drive b’aċċess mhux ristrett; is-CV tiegħek, u; bijonota ta’ bejn 20 u 30 kelma. 

Jekk possibbli, ibgħat skeċċ jew kampjun tax-xogħol artistiku tiegħek meta kien għadu mhux finalizzat jew fi stadu ta’ ppiċċjar, sabiex jidher f’sezzjoni speċjali fuq il-proċess ta’ ħsieb, pitching/kummissjonar u pubblikazzjoni.

Se jintgħażlu massimu ta’ żewġ (2) illustrazzjonijiet u/jew disinji minn kull artist għas-sezzjoni ‘Illustration Today’ tal-esebizzjoni. L-illustrazzjonijiet magħżula se jkunu akkumpanjati mill-kopji tal-pubblikazzjoni korrispondenti.

Aktar dettalji fil-formola tal-applikazzjoni.

Il-Proċess ta’ Għażla

Is-sottomissjonijiet se jiġu evalwati minn kumitat immexxi mill-KNK u l-KMA skont it-tliet kriterji li ġejjin:

💡 L-idea u l-kuntest

⚙  Is-sengħa u t-teknika

🚀 Il-kreattività u l-innovazzjoni

Dati Importanti

Sejħa Miftuħa: L-Erbgħa, it-30 t’April 2025

Għeluq tas-sottomissjonijiet: It-Tnejn, it-2 ta’ Ġunju 2025 (f’nofsinhar)

Tħabbir tar-riżultati: Il-Ġimgħa, l-20 ta’ Ġunju 2025

Għal aktar informazzjoni, ibgħat email lil Jasmine Bajada fuq jasmine-alexa.bajada@gov.mt.