Irridu nisimgħuk: Il-Kunsill Nazzjonali tal-Ktieb Jippubblika l-Istrateġija 2025-2030 għall-Konsultazzjoni

Il-Kunsill Nazzjonali tal-Ktieb (KNK) iħabbar bi pjaċir li għadu kif ippubblika għall-konsultazzjoni l-Viżjoni Strateġika tiegħu għall-ħames snin li ġejjin (2025-2030). L-Istrateġija se tkun qed tilqa’ s-suġġerimenti tagħkom bejn it-28 t’April u d-19 ta’ Mejju, u dan se jservina biex nirfinaw id-dokument u nippjanaw futur aħjar għall-industrija tal-kotba bis-saħħa tagħkom.

Tista’ taċċessa d-dokument minn hawnhekk. Id-dokument għall-konsultazzjoni sar bl-Ingliż. Wara l-perjodu ta’ konsultazzjoni l-Istrateġija tkun disponibbli b’mod bilingwi.

L-istrateġija li qed nipproponu saret f’kollaborazzjoni mal-aġenzija ta’ konsulenza KPMG, li hi kumpanija rinomata internazzjonalment. Id-dokument mibni fuq ħames pilastri ewlenin li xogħolhom huwa li jsaħħu l-ekosistema letterarja nazzjonali, jippromwovu l-lingwa u l-kultura Maltija, jiffaċilitaw l-aċċess għas-servizzi tal-KNK, iqawwu l-governanza u t-trasparenza, u jżidu l-viżibbiltà internazzjonali tal-industrija.

Id-dokument ippreżentat illum huwa riżultat ta’ riċerka u konsultazzjoni fil-fond mal-imsieħba fl-industrija tal-kotba, u jħares lejn futur li fih l-industrija Maltija tkun sostenibbili, professjonali, u tilħaq lil hinn mill-konfini tal-pajjiż.

“Sa mill-ewwel diskussjonijiet li saru dwar l-istrateġija, dejjem ħarisna lejn miri konkreti b’miżuri li nistgħu nattwaw, sabiex il-benefiċċji jinħassu mill-imsieħba tal-industrija tal-kotba f’Malta”, sostna l-Kap Eżekuttiv tal-KNK, Mark Camilleri. “Il-miri realistiċi u l-attenzjoni mitfugħa fuq it-triq ’il quddiem. Dan kollu bbażat fuq riċerka u laqgħat komprensivi”, żied jgħid il-Kap Eżekuttiv, filwaqt li ħeġġeġ lill-pubbliku ġenerali u lill-imsieħba sabiex jersqu ’l quddiem, jgħidu tagħhom, u jikkontribwixxu għall-proċess ta’ konsultazzjoni.

“L-ekosistema letterarja Maltija hija, appuntu, dik – magħmula minn komunità ħajja li ma tgħixx maqtugħa minn komunitajiet oħra. Għalhekk, kruċjali li kulħadd jipparteċipa fil-konsultazzjoni ħalli tkun tirrifletti r-rikkezza ta’ din il-parti essenzjali tal-kultura Maltija”, qal Camilleri.

L-Istrateġija fuq Ħames Snin (2025-2030) tal-Kunsill Nazzjonali tal-Ktieb – li tinkludi l-Viżjoni, il-Missjoni u l-Valuri wara ċ-Ċentru Malti tal-Ktieb – u d-dokument għall-konsultazzjoni ssibhom hawnhekk. Iż-żmien għall-konsultazzjoni jagħlaq fid-19 ta’ Mejju 2025.