Esebituri — applikaw issa sabiex tipparteċipaw fil-Festival Nazzjonali tal-Ktieb tal-2025! 

L-applikazzjonijiet, għal dawk l-esebituri li jixtiequ jieħdu sehem fl-edizzjoni tal-2025 tal-Festival Nazzjonali tal-Ktieb, huma miftuħa. Il-Festival ħa jkun qed jinżamm mill-Erbgħa 5 sal-Ħadd 9 ta’ Novembru ġewwa l-Malta Fairs and Conventions Centre (MFCC) f’Ta’ Qali. 

L-applikazzjonijiet jagħlqu nhar il-Ġimgħa 2 ta’ Mejju 2025. Minn din is-sena wieħed irid japplika permezz tal-pjattaforma ta’ Submittable – iktar dettalji fis-sezzjoni apposta hawn taħt.

Il-Festival Nazzjonali tal-Ktieb ikompli jibni fuq il-legat b’saħħtu tal-verżjoni preċedenti tiegħu, il-Fiera Maltija tal-Kotba, u sa mill-2013 sar parti integrali mill-kalendarju kulturali annwali tal-gżejjer Maltin u jibqa’ l-ikbar avveniment tal-massa fejn jidħlu l-kotba f’Malta u Għawdex. Il-Festival Nazzjonali tal-Ktieb, organizzat mill-Kunsill Nazzjonali tal-Ktieb (KNK), jilqa’ eluf ta’ viżitaturi ta’ kull età u ġejjin minn kull sfera tal-ħajja, li jgawdu min-numru dejjem jikber ta’ esebituri u attivitajiet. Mistiedna internazzjonali ta’ fama jkomplu jgħollu l-valur tal-Festival bħala ċelebrazzjoni prestiġġjuża tal-kelma miktuba.

Applikazzjoni għall-Esebituri — Informazzjoni Importanti

Il-formola ta’ applikazzjoni għal esebituri b’regoli u dispożizzjonijiet aġġornati, hija miftuħa għal pubblikaturi lokali u internazzjonali kollha, distributuri u ħwienet tal-kotba kif ukoll aġenziji li jaħdmu fil-qasam tal-ktieb. NGOs u entitajiet pubbliċi, li l-qasam tagħhom jinvolvi l-pubblikazzjoni tal-kotba jew il-promozzjoni tal-letteratura, kif ukoll awturi awtoppubblikati, huma wkoll eliġibbli sabiex japplikaw. L-istands kollha se jkunu ssussidjati mill-KNK u mnaqqsa b’75% bl-għan li ngħinu lill-esebituri prospettivi.

Bħal f’edizzjonijiet tal-imgħoddi, esebituri jistgħu jitolbu rifużjoni sħiħa fuq il-miżata tal-applikazzjoni jekk jirreġistraw għall-Iskema ta’ Rifużjoni għall-Esebituri jekk jippromwovu l-Festival Nazzjonali tal-Ktieb, l-avvenimenti tagħhom, kotba u/jew il-parteċipazzjoni tagħhom fil-Festival lil udjenza aktar wiesa’ permezz ta’ reklamar u promozzjoni fil-mezzi tax-xandir u l-midja soċjali. 

• Applika permezz ta’ Submittable

Minn din is-sena, il-KNK ħa jkun qed juża’ l-pjattaforma ta’ Submittable għall-applikazzjonijiet kollha tiegħu, dan sabiex jiżgura proċess aħjar u aktar sempliċi għal dawk kollha involuti. Dawk kollha interessati huma mħeġġa japplikaw permezz ta’ din il-ħolqa: ktieb.submittable.com/submit. Esebituri prospettivi huma ġentilment imfakkra illi min japplika kmieni jingħata preferenza fil-programm ta’ avvenimenti għaldaqstant huma mħeġġa jaqraw sew it-termini u l-kundizzjonijiet qabel japplikaw. 

L-applikanti kollha huma mħeġġa jaqraw sew it-termini fuq il-pjattaforma ta’ Submittable. 

• Ħlas

Ħlasijiet tal-miżata għal stands jridu jsiru lill-Kunsill Nazzjonali tal-Ktieb sad-9 ta’ Mejju 2025.

Eżenzjoni sħiħa tal-miżata tapplika għal dawk l-NGOs li jaħdmu fl-industrija tal-kotba kif ukoll Sponsors. 

Ħlasijiet jistgħu jsiru biss permezz ta’  transfer bankarju. 

• Ħinijiet tal-ftuħ aġġornati

Esebituri prospettivi għandhom jieħdu nota tal-ħinijiet tal-ftuħ tal-Festival Nazzjonali tal-Ktieb 2025 kif ġej:

L-Erbgħa 5/11  09:00-13:00; 17:00-21:00

Il-Ħamis 6/11  09:00-13:00; 17:00-21:00

Il-Ġimgħa 7/11  09:00-13:00; 17:00-21:00

Is-Sibt 8/11  10:00-21:00

Il-Ħadd 9/11  10:00-20:00

• Nota fuq l-użu tal-AI  

Il-KNK jgħodd lill-illustraturi u l-artisti tal-kotba fost l-imsieħba importanti ħafna tas-settur. Għal dan l-għan, aħna niskoraġixxu bil-qawwa l-użu ta’ kwalunkwe immaġini ġġenerata bl-AI mill-esebituri prospettivi kollha – sew jekk hu xogħol artistiku fuq l-istand jew kwalunkwe materjal ieħor esebit jew imqassam waqt il-Festival. 

L-applikazzjoni għal esebituri trid timtela’ u tintbagħat permezz ta’ Submittable sa mhux aktar tard mit-2 ta’ Mejju 2025.