Il-KNK isellem il-memorja ta’ Ġorġ Mallia, awtur u kartunist prolifiku, eks Kap tal-KNK

Il-Kunsill Nazzjonali tal-Ktieb (KNK) isellem il-memorja ta’ Ġorġ Mallia, awtur, kartunist u akkademiku li miet fid-19 t’Awwissu fl-età ta’ 68 sena.

Huwa kien ukoll Kap tal-KNK mill-2005 sal-2013.

Mallia kellu preżenza enerġetika u ta’ impatt kemm fis-settur kulturali, kif ukoll f’dak edukattiv, u l-legat tiegħu jikkonsisti f’lista impressjonanti ta’ xogħlijiet ippubblikati, u anke fil-mod kif influwenza u ispira ġenerazzjoni ta’ kittieba, kartunisti, artisti tal-komiks u ġurnalisti, permezz tal-vokazzjoni tiegħu bħala edukatur.

“Il-mewt ta’ Ġorġ Mallia hija telfa monumentali għas-settur kulturali Malti. Ma nkunx qed nesaġera billi ngħid li kważi kwalunkwe persuna b’interess fil-pubblikazzjoni f’Malta – kemm jekk fil-ġurnaliżmu jew fil-letteratura, fil-kotba tat-tfal jew fir-rumanzi grafiċi – tkun ġiet f’kuntatt ma’ Mallia b’xi mod jew ieħor, bħala superviżur jew bħala kollega,” qal il-Kap Eżekuttiv tal-KNK Mark Camilleri. Huwa faħħar l-impatt ta’ Mallia bħala artist u bħala edukatur li ħeġġeġ it-talent żagħżugħ kemm f’xogħlu bħala lettur u anke permezz tal-isforzi tiegħu li jrawwem media mmexxija mill-istudenti fuq il-kampus.

Camilleri żied jgħid, “Ġorġ kien figura importanti fix-xena tal-pubblikazzjoni lokali u punt ta’ referenza għal bosta. In-nuqqas tiegħu se jinħass bil-kbir.”

Mallia kien l-awtur ta’ għadd ta’ xogħlijiet għat-tfal – bħas-sensiliet ta’ Pullu u Il-Professur Għasfur. Huwa rebaħ il-Premju Nazzjonali tal-Ktieb fl-2022 għall-ktieb Il-Ħamsin: 24 Awtur, 24 Storja, in-numru 50, li hu kien editur tiegħu. Xogħlijiet oħra tiegħu għall-adulti jinkludu l-antoloġija ta’ stejjer qosra Mitt Ruħ (2020), kif ukoll il-ġabra ta’ poeżiji My love had eyes of blue and dreams (2019). 

Bħala kartunist u karikaturist notevoli, Mallia ħareġ l-aħħar strixxa komika tiegħu mis-sensiela Żepp għat-Times of Malta ftit jiem biss qabel ħalliena. Is-sensiela Żepp, li nħolqot b’rispons għall-pandemija tal-COVID-19, kienet l-aktar xogħol riċenti ta’ Mallia f’dan il-ġeneru u, sfortunatament, l-aħħar xogħol tiegħu fil-ġeneru. B’hekk din is-sensiela timmarka t-tmiem ta’ karriera prolifika immens fil-kartuns. Il-karriera ta’ Mallia bħala kartunist bdiet fis-Sagħtar fil-bidu tas-70ijiet, u ssaħħet b’One Family, sensiela ta’ komiks soċjopolitiċi li kienu minn tal-ewwel ta’ din ix-xorta f’Malta, u kienu jiġu ppubblikati fuq The Sunday Times bejn l-1993 u l-2008.

Illum il-ġurnata, Mallia huwa sinonimu wkoll mat-tpinġijiet kommemorattivi ta’ persunaġġi Maltin li kien jagħmel u jxerred fuq il-media soċjali meta dawn iħalluna. L-aħħar waħda li għamel kienet iddedikata lix-xandar Malti Norman Hamilton.

Mallia kien Professur tal-Komunikazzjoni, u Kap tad-Dipartiment tal-Media u l-Komunikazzjoni fil-Fakultà tal-Media u x-Xjenzi tal-Għarfien fl-Università ta’ Malta.

Huwa ħalla warajh lil martu u liż-żewġ uliedu. Il-KNK jixtieq jgħaddi l-kondoljanzi sinċiera tiegħu lill-qraba ta’ Mallia f’dan il-mument diffiċli.