Il-KNK impenjat li joffri aktar inizjattivi li jsaħħu l-ħiliet wara s-suċċess tal-kors tal-editjar

Il-Kunsill Nazzjonali tal-Ktieb (KNK) huwa impenjat li jżid l-inizjattivi li joffri lill-imsieħba lokali li jsaħħu l-ħiliet, wara li ntemm b’suċċess kors ta’ sitt ġimgħat fuq l-editjar tal-kotba li sar online mit-23 ta’ Lulju sal-1 ta’ Settembru.

Il-kors, bl-isem ‘Become a Book Editor’ kien disponibbli fuq il-pjattaforma ELVTR u ngħata mill-editur rinomat Francesco Vilhena, li jgħix u jaħdem fir-Renju Unit. Il-kors ġie offrut bla ħlas lil tliet parteċipanti Maltin fuq bażi ta’ min japplika l-ewwel jinqeda l-ewwel, b’investiment dirett mill-KNK.

Il-kors ikkonsista kemm f’elementi prattiċi u bbażati fuq is-sengħa tal-proċess editorjali – bħall-qari tal-provi, it-tekniki tal-copyediting, l-evalwazzjoni ta’ manuskritt u l-għoti tar-rispons kostruttiv – u kkonsista wkoll f’marketing, fid-disinn, fil-kunsiderazzjonijiet legali u etiċi fid-dinja tal-pubblikazzjoni.

Il-Kap Eżekuttiv tal-KNK Mark Camilleri qal, “Kif stennejna, il-kors ‘Become a Book Editor’ kien esperjenza ta’ valur għall-parteċipanti, kif ukoll indikatur ewlieni ta’ kif il-KNK beħsiebu jkompli jiżviluppa tali inizjattivi u kollaborazzjonijiet fil-futur.”

Meta ntalbu kumment fuq l-esperjenza tagħhom, il-parteċipanti spjegaw kif il-kors għenhom jiksbu għarfien aktar komprensiv tal-proċess editorjali, li jiġbor l-aspetti kreattivi u anke tekniċi tax-xogħol, kif ukoll punti usa’ dwar l-industrija tal-pubblikazzjoni b’mod ġenerali.

Camilleri nnota li t-tliet parteċipanti kollha marru tajjeb fil-kors, u qal li dan ikompli jsostni d-deċiżjoni tal-KNK li mhux biss jinvesti f’tali inizjattivi, imma anke li jespandi fuqhom fil-ġejjieni.

“Aħna nqisu din l-ewwel kollaborazzjoni ma’ entità bħal ELVTR bħala test pożittiv ta’ dak li għad irid iseħħ. Filwaqt li jilqa’ kull rispons, il-KNK għandu l-għan li jesplora opportunitajiet oħra li jsaħħu l-kapaċitajiet tal-individwi fis-settur fix-xhur li ġejjin,” żied jgħid Camilleri.

Fil-fatt, is-suġġett li jmiss fuq din l-aġenda partikolari tal-KNK huwa kors dwar il-kitba tal-proża fittizja mogħti minn The Novelry – li għalih ukoll imtlew il-postijiet disponibbli f’ħin rekord.

Dawk interessati f’inizjattivi futuri ta’ din ix-xorta huma mħeġġin isegwu lill-Kunsill Nazzjonali tal-Ktieb fuq Facebook u Instagram, u jirreġistraw għan-newsletter b’email tal-KNK minn fuq dan is-sit