Jitħabbru l-finalisti tal-Premju Nazzjonali tal-Ktieb 2025

Il-Kunsill Nazzjonali tal-Ktieb (KNK) qed iħabbar bi pjaċir il-lista tal-finalisti għall-Premju Nazzjonali tal-Ktieb u l-Premju Terrramaxka 2025 għal kotba ppubblikati fl-2024. Il-Premju – li l-ewwel edizzjoni tiegħu kienet fl-1971 – huwa l-ogħla ġieħ letterarju mogħti lil awturi, edituri, tradutturi, pubblikaturi u illustraturi għal kotba ppubblikati f’Malta.

Ir-rebbieħa se jitħabbru waqt ċerimonja speċjali fis-26 ta’ Settembru. Kull rebbieħ se jingħata perjodu ta’ promozzjoni, kif ukoll ikun esebit waqt il-Festival Nazzjonali tal-Ktieb li se jsir bejn il-5 u d-9 ta’ Novembru l-MFCC.

It-23 finalist tal-Premju Nazzjonali tal-Ktieb 2025 ntgħażlu unanimament minn bord ta’ aġġudikazzjoni indipendenti skont damma ta’ kriterji stabbiliti. Hemm 14-il ktieb finalist f’sitt kategoriji tal-kotba għall-adulti, u 9 kotba finalisti fil-kategoriji tal-Premju Terramaxka għat-Tfal u ż-Żgħażagħ. Bejniethom hemm 10 pubblikaturi u kittieb awtoppubblikat, 28 awtur, tradutturi u illustraturi. Fil-kategoriji tat-tfal u ż-żgħażagħ hemm 9 illustraturi finalisti.

Il-Premju Nazzjonali tal-Ktieb fih tmien kategoriji għall-adulti, li huma r-Rumanzi, in-Novelli, il-Poeżija, id-Drama, il-Letteratura mhux Fittizja, il-Proża Fittizja Tradotta, ir-Riċerka, u r-Riċerka Storjografika, u sitta fil-Premju Terramaxka, li huma Kotba tal-Istampi għat-Tfal (0-7 snin), Kotba għat-Tfal (8-12-il sena), Letteratura għaż-Żgħażagħ, u l-istes tliet kategoriji għat-traduzzjonijiet. Madankollu dis-sena ma kienx hemm sottomissjonijiet għall-kategorija tat-traduzzjonijiet għaż-żgħażagħ.

Il-proċess tal-aġġudikazzjoni dis-sena beda fit-2 ta’ April bil-pubblikazzjoni tal-lista t-twila. Sat-3 ta’ Marzu l-pubblikaturi u l-awturi ssottomettew total ta’ 149 ktieb eliġibbli biex jgħaddu għall-fażi tal-aġġudikazzjoni tal-Premju Nazzjonali tal-Ktieb 2025.

Il-bord tal-aġġudikazzjoni qabel li ma jagħżilx finalisti fil-kategoriji tan-Novelli u tal-Letteratura mhux Fittizja, kif ukoll f’żewġ kategoriji tat-traduzzjonijiet għat-tfal, jiġifieri Kotba Tradotti għat-Tfal (0-7 snin) u Kotba Tradotti għat-Tfal (8-12-il sena).

​​Din l-għażla tiżgura li l-integrità tal-premju tinżamm billi jiġu mħarsa l-istandards meħtieġa u billi jintwera li l-ġurija applikat ir-rigorożità u l-għarfien kritiku meħtieġa meta għażlet il-finalisti.

Filwaqt li l-aġġudikanti esprimew fiduċja sħiħa fil-lista tal-finalisti, u ddeskrivew ix-xogħlijiet bħala innovattivi, friski u ferm attraenti li jagħnu l-korp letterarju Malti, esprimew ukoll xi tħassib li ta’ min wieħed jagħti kasu.

Sfida ewlenija hija n-nuqqas “endemiku” ta’ proċessi editorjali kif suppost, liema nuqqas jidher fil-kategoriji kollha. Fix-xogħlijiet tal-finzjoni, l-aġġudikanti innutaw li l-awturi ppruvaw jgħidu ħafna affarijiet f’daqqa, u allura ma kienx hemm koeżjoni jew identità li tista’ tiġi attribwita lix-xogħol inkwistjoni – sitwazzjoni stilistika li setgħet tiġi indirizzata minn qabel kieku kien hemm fażi ta’ editjar aktar rigoruża.

Bl-istess mod, l-aġġudikanti raw li l-kategoriji tar-riċerka – ir-Riċerka, ir-Riċerka Storjografika, u l-Letteratura mhux Fittizja – ukoll batew minn nuqqas ta’ attitudni editorjali. Qalu li ċerti kotba kienu biss ripubblikazzjoni ta’ xi teżi fl-intier tagħha, filwaqt li oħrajn ma kinux se jilħqu l-livell mitlub mill-Premju Nazzjonali tal-Ktieb għax ma kellhomx reviżjoni minn pari. Fil-kategoriji tat-Terramaxka, l-aġġudikanti kkummentaw li xi kotba kellhom suġġett ta’ min wieħed jaqrah, iżda dan ħa daqqa ’l isfel għax kien akkumpanjat minn illustrazzjonijiet ta’ livell baxx. Oħrajn kienu miżgħuda b’narrattivi qodma jew repetittivi.

Finalment, l-aġġudikanti ssuġġerew li tibda titfassal l-infrastruttura neċessarja fl-industrija tal-kotba li tkun tista’ twieżen il-proċess editorjali.

Il-kotba finalisti kollha tal-Premju Nazzjonali tal-Ktieb u l-Premju Terramaxka tista’ ssibhom fil-ħwienet tal-kotba lokali u anki online, u se jkunu disponibbli wkoll waqt il-Festival Nazzjonali tal-Ktieb 2025 (5-9 ta’ Novembru) fiċ-Ċentru għall-Fieri u l-Konvenzjonijiet (MFCC) Ta’ Qali.

Għal aktar informazzjoni dwar il-Premju Nazzjonali tal-Ktieb 2025 u l-inizjattivi l-oħra tal-Kunsill Nazzjonali tal-Ktieb, żurna fuq www.ktieb.org.mt jew mill-paġna tal-Facebook.

Il-Premju Nazzjonali tal-Ktieb 2025: Kotba 2024

Rumanzi

Novelli

Ma ntgħażlux finalisti

Poeżiji

Drammi

Proża Fittizja Tradotta

Letteratura Mhux Fittizja

Ma ntgħażlux finalisti

Riċerka

Riċerka Storjografika

Kotba għat-Tfal (Etajiet 0–7)

Kotba għat-Tfal (Etajiet 8-12)

Letteratura għaż-Żgħażagħ

Kotba Tradotti għat-Tfal (Etajiet 0-7)

Ma ntgħażlux finalisti

Kotba Tradotti għat-Tfal (Etajiet 8-12)

Ma ntgħażlux finalisti

Letteratura għaż-Żgħażagħ Tradotta

Ma kienx hemm sottomissjonijiet