Ir-rebbieħ tal-Konkors Lettararju ta’ Films Qosra b’sottotitli multilingwi

[vc_row][vc_column][vc_column_text]

Il-Kunsill Nazzjonali tal-Ktieb (KNK) jifraħ lill-istudenti tal-Maġisteru mill-Università ta’ Malta, li ħadu sehem fis-sessjonijiet tat-Tradutech għal dis-sena. Dis-sena d-Dipartiment tat-Traduzzjoni, it-Terminoloġija u l-Istudji fl-Interpretar ħadem mal-KNK sabiex jitħaffef l-iżvilupp ta’ komponent awdjoviżiv iffukat fuq is-sottotitli.

Bħala parti minn dawn is-sessjonijiet, sitt studenti tat-traduzzjoni pproduċew sottotitli bl-Ingliż, il-Franċiż u t-Taljan għal-film Dritt għall-Punt, dirett minn Matt Stroud. Bħala r-rebbieħ tal-Konkors Letterarju għall-Films Qosra fl-2017, il-film Dritt għall-Punt kien ġie addattat min-novella ta’ Joe Friggieri li ġġib l-istess isem, u li tidher fil-ġabra ta’ novelli Nismagħhom Jgħidu (Kite Publishing, 2016). Il-film qasir bis-sottotitli multilingwi miżjuda jinsab fuq is-sit tal-Youtube u l-Facebook tal-KNK.

L-inizjattiva Tradutech isseħħ fil-parametri tal-proġett Ewropew imsejjaħ OTCT (Optimising Translator Training through Collaborative Technical Translation), u tieħu l-forma ta’ sessjonijiet ta’ traduzzjoni intensivi, kollaborattivi u tekniċi mqiegħda f’sitwazzjonijiet daqslikieku professjonali. B’kollox jieħdu sehem 7 universitajiet Ewropej, fosthom dik Maltija. Is-sessjonijiet huma ddiżinjati biex jisfidaw lill-istudent bis-saħħa ta’ sitwazzjonijiet reali u modi kif issolvi problemi li se jiltaqgħu magħhom fl-industrija. Is-sottotitli multilingwi huma xogħol Amina Baldacchino, Martina Caruana, Martina Cremona, Ilaria Alice Feltre, Nathlin Johnson, u Paola Pagano Mariano. Jikkoordina l-proġett f’isem id-Dipartiment tat-Traduzzjoni kien hemm Prof. A. Aquilina.

Il-Konkors Letterarju ta’ Films Qosra, organizzat mill-Kunsill Nazzjonali tal-Ktieb, jinsab fil-ħames sena konsekuttiva u l-għan tiegħu hu li jsaħħaħ il-produzzjonijiet awdjoviżivi bbażati fuq xogħlijiet letterarji lokali. Il-konkors miftuħ għal timijiet li jipproduċu l-films u li jkunu interessati biex jaddattaw novelli Maltin f’films ta’ bejn 15 u 20 minuta. Il-fondi għall-Konkors Letterarju ta’ Films Qosra għall-2019 ingħataw lil Mr. Peter Sant u l-kumpanija tiegħu Hereonin Ltd. għall-addattament tan-novella Ġulina ta’ Alfred Sant, ippubblikata fil-ġabra jisimha Pupu fil-Baħar – Rakkonti u Divertimenti (SKS, 2009). Il-film qasir se jintwera għall-ewwel darba s-Sibt 9 ta’ Novembru waqt il-Festival Nazzjonali tal-Ktieb 2019.

[/vc_column_text][vc_single_image image=”8712″ img_size=”full” alignment=”center”][/vc_column][/vc_row]