Drittijietek! Sessjoni b’xejn fuq Zoom mill-Aġent Letterarju Simon Trewin lill-imsieħba tagħna

Il-Kunsill Nazzjonali tal-Ktieb (KNK) qed jistieden għal darb’oħra lill-professjonisti kollha fl-industrija tal-kotba Maltija biex jipparteċipaw f’sessjoni b’xejn fuq Zoom mill-aġent letterarju internazzjonali Simon Trewin.

Is-sessjoni ‘Everything You Ever Wanted to Know About Publishing Contracts… But Never Dared Ask’ se ssir fit-30 ta’ Mejju fl-4pm u se ddum 90 minuta. Trewin se jfiehem pass pass kif ikun kuntratt normali tal-pubblikazzjoni bejn awtur u pubblikatur, u xi jfissru kull klawżola li jkun hemm. Se jkun hemm ħin biżżejjed għall-mistoqsijiet. Dis-sessjoni hi tkomplija ta’ dik li tellajna fi Frar li għadda, li kien jisimha ‘The Rights Stuff’.

Trewin se juża kuntratt eżistenti bħala każ ta’ studju (ixxerjat fuq skrin), u bi kliem sempliċi jħaffef il-kliem legali li wieħed normalment isib u jgħid kif jaffettawaw lill-awtur u lill-pubblikatur. Fost l-oħrajn, se nitkellmu dawr:

• X’inhuma d-drittijiet li se tkun qed tagħti lill-parti l-oħra u x’inhuma dawk li se tkun qed takkwista
• Id-differenza bejn dħul nett u d-dħul minn drittijiet skont kemm ikun jiswa l-ktieb
• X’inhi l-klawżola tal-għażla u xi tfisser għall-kotba futuri tiegħek
• Kif taħdem il-kwistjoni tat-treġġigħ lura tad-drittijiet
• Fejn l-aħjar li tagħmel pass lura – u kif tagħmlu

Trewin huwa veteran tal-industrija tal-kotba fir-Renju Unit, u minn taħt idejh għaddew awturi li ġew tradotti f’60 lingwa differenti, fosthom kittieba rinomati bħal John Boyne u Paul Lynch, rebbieħ tal-Premju Booker. Il-ħidma bejn il-KNK u Trewin ilha għaddejja diversi snin, u bis-saħħa tagħha Trewin qed jaġixxi bħala ambaxxatur letterarju għal Malta.

Il-laqgħa se tkun irrikordjata u arkivjata b’mod miktub sabiex kulħadd ikun jista’ jaċċessaha fil-futur.
Is-sessjoni b’xejn, iżda trid tinkiteb hawnhekk. Dawk il-parteċipanti li jkollhom xi mistoqsijiet iridu jniżżluhom fil-formola stess li se tinkitbu biha.