Il-Kunsill Nazzjonali tal-Ktieb isellem il-memorja ta’ Alfred Palma

Il-Kunsill Nazzjonali tal-Ktieb (KNK) jinsab imnikket bil-mewt ta’ Alfred Palma, kittieb u traduttur prominenti fix-xena letterarja Maltija.

Palma qaleb bosta mix-xogħlijiet ta’ Shakespeare għall-Malti, u fl-2021 ippubblika t-traduzzjoni tad-Divina Commedia (Klabb Kotba Maltin) ta’ Dante. Għal dan ix-xogħol, li ħadlu ħafna snin, tfaħħar kemm mill-kritiċi letterarji, mill-qarrejja, u anki mill-aġġudikanti tal-Premju Nazzjonali tal-Ktieb.

Fost unuri oħra, Palma rebaħ il-Premju Nazzjonali tal-Ktieb 6 darbiet, l-aktar għat-traduzzjonijiet tiegħu, fosthom il-Premju Speċjali għall-Kontribut Siewi fil-Letteratura. Fl-2009 ngħata Ġieħ ir-Repubblika għall-kontribut tiegħu fil-qasam letterarju, u sentejn ilu ngħata t-titlu ta’ Cavaliere dell’Ordine della Stella d’Italia, digriet iffirmat mill-President Taljan Sergio Mattarella.

Il-KNK iwassal l-għomor tiegħu lill-familjari, ħbieb, u qarrejja ta’ Alfred Palma.

Ritratt ta’ Yvonne Aguis minn Meta.