Avviż lill-Esebituri u l-Organizzaturi tal-Avvenimenti – Applikaw Issa Biex Tipparteċipaw fil-Festival Nazzjonali tal-Ktieb 2026!



Infetħu l-applikazzjonijiet għall-esebituri li jixtiequ jipparteċipaw fl-edizzjoni tal-Festival Nazzjonali tal-Ktieb tal-2026. Il-Festival se jsir mill-Erbgħa 4 ta’ Novembru sal-Ħadd 8 ta’ Novembru fiċ-Ċentru għall-Fieri u l-Konvenzjonijiet (MFCC) f’Ta’ Qali.

Il-Festival Nazzjonali tal-Ktieb, imsejjes fuq il-legat għani tal-Fiera tal-Ktieb, mill-2013 ’l hawn sar parti integrali mill-kalendarju kulturali annwali tal-gżira, u jżomm postu bħala l-akbar avveniment ibbażat fuq il-ktieb f’Malta u Għawdex. Il-Festival, li huwa organizzat mill-Kunsill Nazzjonali tal-Ktieb (KNK), jilqa’ eluf ta’ viżitaturi ta’ kull età u minn kull qasam, li jżuru l-istands tal-ħafna esebituri u jattendu l-attivitajiet li jkunu għaddejjin. Mistednin internazzjonali rinomati jkomplu jżidu mal-preġju ta’ dan l-avveniment, u jsawruh f’ċelebrazzjoni prestiġjuża tal-kelma miktuba.

Minn din is-sena, il-proċess tal-applikazzjonijiet se jinqasam f’żewġ taqsimiet: waħda għall-esebituri li jipparteċipaw fil-Festival billi jkollhom stand, u oħra għall-individwi jew l-entitajiet li japplikaw sabiex ikollhom avveniment bħala parti mill-programm tal-festival mingħajr ma jkollhom stand permanenti fil-Festival.

Id-data ta’ skadenza sabiex jiġu sottomessi l-applikazzjonijiet għall-esebituri hija l-19 ta’ Mejju, filwaqt li l-iskadenza għall-applikazzjonijiet tal-avvenimenti hija t-30 ta’ Ġunju. Iż-żewġ tipi ta’ applikazzjonijiet għandhom jiġu pproċessati permezz tal-pjattaforma Submittable — aktar dettalji fit-taqsimiet relevanti hawn taħt.

Applikazzjoni għall-Esebituri — Tagħrif Importanti

Il-formola ta’ applikazzjoni għall-esebituri, b’regoli, regolamenti u dispożizzjonijiet, hija miftuħa għall-pubblikaturi, id-distributuri tal-kotba, il-ħwienet u l-aġenziji tal-kotba kollha lokali u internazzjonali. L-NGOs u l-entitajiet pubbliċi li l-qasam tagħhom jinvolvi l-pubblikazzjoni tal-kotba jew il-promozzjoni tal-letteratura, kif ukoll awturi awtoppubblikati, ukoll huma eliġibbli sabiex japplikaw. Il-miżati kollha tal-istands se jiġu ssussidjati mill-KNK, u jitnaqqsu b’75% b’tentattiv li jiġu appoġġjati l-esebituri prospettivi.

Agħfas hawn sabiex taqra l-linji gwida u r-regolamenti kollha.

Applikazzjoni għall-Avvenimenti — Tagħrif Importanti

L-entitajiet u l-individwi interessati li jorganizzaw avvenimenti waqt il-Festival Nazzjonali tal-Ktieb 2026 għandhom jissottomettu l-informazzjoni relevanti kollha permezz ta’ Submittable sa mhux aktar tard mit-30 ta’ Ġunju 2026.

Il-parteċipanti jridu jissottomettu d-dettalji kollha tal-avvenimenti proposti sad-data ta’ skadenza sabiex jiġu kkunsidrati li jiġu inklużi fil-programm uffiċjali, b’applikazzjonijiet għal avvenimenti waħedhom (jiġifieri dawk mingħajr stand ta’ esebitur fil-Festival) b’miżata ta’ €30, li tiġi rinunzjata għall-esebituri mħallsin. Hemm żewġ kategoriji ta’ avvenimenti disponibbli: Tip A (avvenimenti li jsiru fi spazji tal-festival apposta) u Tip B (avvenimenti li jsiru fuq l-istands tal-esebituri stess), kull waħda b’informazzjoni speċifika meħtieġa bħad-deskrizzjonijiet tal-avvenimenti, id-dettalji tal-kelliema, il-preferenzi fl-iskeda, u l-pjanijiet għall-marketing.

Il-Kunsill Nazzjonali tal-Ktieb huwa responsabbli għal min jiġi inkluż fil-programm, l-iskeda, u kwalunkwe bidla li ssir. Id-deċiżjonijiet finali se jiġu kkomunikati sas-7 t’Awwissu 2026.

Agħfas hawn sabiex taqra l-linji gwida u r-regolamenti kollha.

Dawk kollha interessati huma mitlubin japplikaw permezz ta’ din il-ħolqa: ktieb.submittable.com/submit. Esebituri prospettivi huma ġentilment imfakkrin li applikazzjonijiet bikrin se jingħataw preferenza fil-programm tal-avvenimenti u huma mħeġġin jaqraw sewwa t-termini u l-kundizzjonijiet qabel ma japplikaw.

L-applikanti kollha huma mitlubin jaqraw sewwa t-termini fuq il-pjattaforma Submittable.

Pagament

Il-pagament tal-miżati għall-istands għandu jsir lill-Kunsill Nazzjonali tal-Ktieb sal-15 ta’ Mejju, 2026.

Il-pagament jista’ jsir biss permezz ta’ Submittable mill-pjattaforma tal-applikazzjonijiet.

Ħinijiet tal-Ftuħ Aġġornati

Esebituri prospettivi għandhom jinnutaw li l-ħinijiet tal-ftuħ tal-Festival Nazzjonali tal-Ktieb 2026 huma dawn li ġejjin:

L-Erbgħa     4/11  09:00-21:00
Il-Ħamis       5/11  09:00-13:00; 17:00-21:00
Il-Ġimgħa    6/11  09:00-13:00; 17:00-21:00
Is-Sibt         7/11   09:00-21:00
Il-Ħadd       8/11  09:00-20:00

• Nota dwar l-użu tal-IA

Il-KNK jqis lill-illustraturi u lill-artisti tal-kotba fost l-imsieħba ewlenin tiegħu. Għal dan il-għan, niskoraġġixxu lill-esebituri prospettivi kollha milli jużaw stampi ġġenerati mill-IA — kemm fl-arti użata fuq l-istand tagħhom jew kwalunkwe materjal ieħor muri jew distribwit matul il-FNK.

Id-data ta’ skadenza għas-sottomissjoni tal-applikazzjonijiet għall-esebituri hija l-19 ta’ Mejju, filwaqt li d-data ta’ skadenza għall-applikazzjonijiet tal-avvenimenti hija t-30 ta’ Ġunju. Iż-żewġ tipi ta’ applikazzjonijiet għandhom jiġu pproċessati permezz tal-pjattaforma Submittable.