Jiftaħ il-Festival Nazzjonali tal-Ktieb: Premju Terramaxka 2019

Il-Festival Nazzjonali tal-Ktieb kellu l-ftuħ uffiċjali llum fis-7:00 ta’ filgħaxija biċ-ċerimonja ta’ premjazzjoni għall-Premju Terramaxka 2019, immexxija minn Daniel Chircop u Chrysander Agius. Iċ-ċerimonja saret fiċ-Ċentru tal-Mediterran għall-Konferenzi, il-Belt Valletta, u kienet ippreseduta mill-Kap Eżekuttiv tal-Kunsill Nazzjonali tal-Ktieb, Mark Camilleri.

Fid-diskors tal-ftuħ tiegħu, Camilleri saħaq fuq l-importanza li  s-settur tal-kotba li jkompli jikber, grazzi wkoll għall-Festival Nazzjonali tal-Ktieb. F’dan ir-rigward, il-Kunsill Nazzjonali tal-Ktieb stinka biex jagħti spinta kummerċjali lill-industrija permezz tal-Festival, billi jżid iċ-ċifri tal-attendenza u jsaħħaħ id-dimensjoni internazzjonali tiegħu bil-parteċipazzjoni ta’ awturi mistiedna. Camilleri għalaq billi rringrazzja lill-Ministeru tal-Edukazzjoni talli jagħraf l-irwol importanti tal-ktieb għall-iżvilupp kulturali tas-soċjetà, u ta’ industrija tal-kotba b’saħħitha li ssostnih.

L-avveniment segwa b’qari minn Ira Losco mill-ktieb Jissokta l-Każ ta’ Saver u Ludmilla De Molizz, li s-sena li għaddiet rebaħ fil-kategorija ta’ kotba għat-tfal ta’ etajiet 8-12 tal-Premju Terramaxka. Ir-rebbieħa kienu mbagħad imħabbra fl-ordni tal-kategoriji skont l-etajiet, li jibdew minn 0-7, u jibqgħu sejrin sa 13-16, kemm b’xogħlijiet oriġinali kif ukoll tradotti.

Wara ċ-ċerimonja tal-għoti tal-premijiet, il-Ministru għall-Edukazzjoni u x-Xogħol Evarist Bartolo indirizza r-rilevanza partikolari tal-letteratura u l-istudji umanistiċi f’dinja primarjament okkupata bi żviluppi ekonomiċi u teknoloġiċi. Team jgħid li l-letteratura u l-qari jfakkruna f’dak li jagħmilna umani, u għalhekk f’pajjiż żgħir bħal Malta l-Istat għandu responsabbiltà miżjuda biex ikompli jinvesti fis-settur tal-kotba u l-kittieba tiegħu.

Ir-rebbieħa huma elenkati hawn taħt:

Kategorija: xogħlijiet oriġinali (0-7)

Clare Azzopardi, Il-Ħanut tal-Ħelu Li Mar Dawra (Merlin Publishers, illustrat minn Matt Stroud)

Kategorija: xogħlijiet oriġinali (8-12)

John A. Bonello, Irvin Vella: Investigatur Virtwali: Il-Każ tal-Gżejjer tat-Teżor (Merlin Publishers)

Kategorija: xogħlijiet oriġinali (13-16)

Antoinette Borg, Amina (Merlin Publishers) 

Kategorija: xogħlijiet tradotti (0-7)

Rachel Portelli, L-Annimali tas-Savana: Il Verità Kollha fuq l-Annimali, traduzzjoni tal-ktieb Les animaux de la savane ta’ éditions Auzou u illustrat minn Anne Passchier (Merlin Publishers)

Kategorija: xogħlijiet tradotti (8-12)

Dwayne Ellul, Missjoni: Insalvaw il-Pjaneta l-Blu, tradott mill-ktieb Mission: Save the Planet ta’ Helena Harastová, Štěpánka Sekaninová u illustrat minn Jakub Cenkl  (Merlin Publishers)

Kategorija: premju għall-aħjar produzzjoni tal-kotba

Rita Saliba u Moira Scicluna Zahra (illustratriċi), Lorella u l-Ġenju Li ma Kienx Jaf Jaqra (BDL Publishing)