Maria Grech Ganado fil-Festival Nazzjonali tal-Ktieb 2016
Fl-2015 il-Kunsill Nazzjonali tal-Ktieb iddeċieda jiddedika avveniment lir-rebbieħ tal-Lifetime Achievement Award tas-sena ta’ qabel. Ir-rebbieħ tal-premju tal-2014 kien il-mibki Professur Godfrey Wettinger, magħruf l-iktar għall-iskoperta u l-ewwel traduzzjoni (flimkien ma’ Michael Fsadni) tal-ikbar teżor letterarju tal-pajjiż: Il-Kantilena ta’ Pietru Caxaro, u anke għal kontra-argument li bih ċaħad it-teorija tal-kontinwita tal-Kristjaneżmu f’Malta kif kien ippropona Gian Francesco Abela.
Din is-sena allura jmiss li niċċelebraw ix-xogħol u l-ħidma letterarja tar-rebbieħ tal-premju fl-2015, il-poetessa Maria Grech Ganado, l-awtur ta’ waħda mill-poeżiji l-iktar maħbuba fil-letteratura Maltija moderna, Jum San Valentin, u l-ewwel mara li nħatret lecturer fl-Università ta’ Malta. Is-serata ser tħares kemm lejn ix-xogħol letterarju kif ukoll il-ħidma tagħha fl-oqsma tas-soċjeta u l-kultura.
Maria ser titħaddet ma’ Charles Calleja matul l-avveniment li ser iseħħ nhar il-Ġimgħa 11 ta’ Novembru, f’Dar il-Mediterran għall-Konferenzi, fit-tmienja u nofs ta’ filgħaxija.
Għal aktar informazzjoni żuru il-paġna tal-Festival Nazzjonali tal-Ktieb fuq Facebook: https://www.facebook.com/events/1951963831697045/
