Sir af min huma l-Esebituri tal-Festival Nazzjonali tal-Ktieb!

Fl-edizzjoni tal-Festival Nazzjonali tal-Ktieb ta’ dis-sena se nkunu qed Niktbu mill-Ġdid, bis-saħħa tal-parteċipazzjoni ta’ aktar minn 40 esebitur li flimkien se joħolqu atmosfera ċelebrattiva tal-qawwa trasformattiva li għandhom il-kotba u l-qari; esperjenza rikka u li se tispirak bil-mod uniku tal-Festival.

Il-Festival issa jinsab fis-46 edizzjoni tiegħu, u dis-sena se jsir bejn il-5 u d-9 ta’ Novembru fiċ-Ċentru għall-Fieri u l-Konvenzjonijiet (MFCC) Ta’ Qali. Tul is-snin l-avveniment għadda minn bidliet meħtieġa sabiex jimxi maż-żminijiet, madankollu ħaġa waħda baqgħet l-istess – il-preżenza tal-aħjar pubblikaturi u bejjiegħa tal-kotba Maltin li se jieħdu l-ispazju kollu tal-MFCC tul ħamest ijiem.

Il-Kap Eżekuttiv tal-Kunsill Nazzjonali tal-Ktieb, Mark Camilleri, innota li l-KNK jinsab kuntent immens bit-tfassil tal-programm li fih aktar minn 100 attività, iżda li madankollu huma l-esebituri nfushom li jagħtu identità partikulari lil dan l-avveniment.

“Minn pubblikaturi b’legat twil warajhom sa oħrajn ġodda, bejjiegħa tal-kotba, NGOs u entitajiet internazzjonali bbażati f’Malta, il-Festival jissarraf f’ċelebrazzjoni annwali tal-kotba li tiżviluppa fi mkien fejn jiltaqgħu kulturi differenti b’viżitaturi ta’ kull età u viji differenti tal-ħajja – li kollha se jsibu xi ħaġa li tolqothom u li, l-aktar importanti, tibqa’ magħhom sa wara l-Festival”, qal Camilleri.

Il-lista sħiħa tal-esebituri ssibha hawnhekk.

Żomm ruħek infurmat dwar dak kollu li ħabbarna sa issa!

-Ara hawnhekk, hawnhekk u hawnhekk min huma t-tliet mistiedna internazzjonali.

-Irfina l-ħiliet tiegħek u l-għodda tan-networking b’masterclasses u workshops esklussivi (hawnhekk)

-Ikteb lit-tfal għax-xows teatrali hawnhekk

-Ħares lejn il-programm sħiħ tal-attivitajiet hawnhekk

Il-Festival Nazzjonali tal-Ktieb se jsir l-MFCC bejn il-5 u d-9 ta’ Novembru. Għal aktar informazzjoni żur il-paġna tal-Festival hawnhekk. Tista’ ssib informazzjoni dwar il-Festival minn Facebook jew mill-Instagram tal-Kunsill Nazzjonali tal-Ktieb.