L-esebituri tal-Festival Nazzjonali tal-Ktieb 2022

Il-Kunsill Nazzjonali tal-Ktieb (KNK) qed iħabbar bi pjaċir il-lista rekord ta’ 49 esebitur li dis-sena se jipparteċipaw waqt il-Festival Nazzjonali tal-Ktieb. Il-biċċa l-kbira tagħhom se jorganizzaw varjetà ta’ attivitajiet relatati mal-kotba.

Il-lista tal-esebituri fil-maġġorparti tagħha magħmula minn pubblikaturi lokali u bejjiegħa tal-kotba, iżda hemm għadd ġmielu ta’ esebituri oħra, ngħidu aħna organizzazzjonijiet studenteski, għaqdiet mhux governattivi (NGOs), u aġenziji pubbliċi b’rabtiet mal-industrija tal-kotba. Hemm żieda wkoll fl-għadd ta’ kittieba awtoppubblikati li se jkollhom stand kull wieħed għalihom, wara li s-sena l-oħra kienet l-ewwel darba li pparteċipaw. 

Il-programm jiżgħed b’attivitajiet differenti ppreparati għal udjenzi b’interessi u gosti differenti. Minbarra l-attivitajiet organizzati mill-KNK, l-esebituri se jorganizzaw għexieren ta’ attivitajiet għall-qarrejja ta’ kull età, mifruxin fuq ħamest ijiem. L-attivitajiet ivarjaw minn tnedijiet u preżentazzjonijiet ta’ kotba, konferenzi, gruppi ta’ ħidma, diskussjonijiet tematiċi, seminars, u attivitajiet ta’ gost għat-tfal u l-familji.

Il-KNK ħadem ma’ wħud minn dawn l-esebituri, bil-għan li l-Festival iservi bħala pjattaforma b’saħħitha għall-professjonisti fil-qasam tal-pubblikazzjoni, kif ukoll sabiex jasal għand aktar nies. Ikkollaborajna mal-Kunsill Malti għall-Arti biex għall-ewwel darba jkollna esebizzjoni li se tilqa’ lin-nies huma u deħlin l-MFCC. L-esebizzjoni From Illustration to Book se jkun fiha x-xogħol ta’ illustraturi Maltin u barranin li ppubblikaw Malta, u se tkun b’xejn għal kulħadd. Il-Festival se jkun ukoll qed jospita spazju għal tfal fuq l-ispettru tal-awtiżmu jew oħrajn li jkollhom bżonn jirtiraw fi mkien li jikkalmahom emozzjonalment. Barra minn hekk, l-Aġenzija għall-Enerġija u l-Ilma se tkun qed ittella’ attivitajiet għat-tfal matul il-ġimgħa kollha, bejn esperimenti fl-użu effiċjenti tal-enerġija u sessjonijiet ta’ qari.

Il-programm sħiħ tal-attivitajiet għall-Festival Nazzjonali tal-Ktieb 2022 (23-27 ta’ Novembru) se jkun ippubblikat fil-ġimgħat li ġejjin. Għal aktar aġġornamenti żur dan is-sit, il-paġna tal-Facebook tal-Kunsill Nazzjonali tal-Ktieb u u l-paġna tal-Facebook  tal-Festival Nazzjonali tal-Ktieb.

Hawn isfel issib il-lista sħiħa tal-esebituri: